గూడు కట్టకుండానే గుడ్డు పెట్టేస్తా!

కోకిల రూపం.. తెల్లని వర్ణం.. చూడగానే విచిత్రంగా అనిపిస్తున్న

నా పేరు వైట్‌టెర్న్‌.. నేనో సముద్ర పక్షిని..

మాకు కొన్ని ప్రత్యేకతలున్నాయి.. అవేంటో చదివేస్తారా మరి!

బుల్లిపిట్ట.. బుజ్జిపిట్ట!

మేం కాస్త చిన్న పక్షులం

* కానీ రెక్కలు మాత్రం వెడల్పుగా ఉంటాయి.

* రెక్కలు విప్పితే 76 నుంచి 77 సెంటీమీటర్ల పొడవుంటాం.

* మేం తెల్లగా.. చూడటానికి చాలా అందంగా ఉంటాం.

* మాలో మరికొన్ని రకాలూ ఉన్నాయి.

ఒకే ఒక గుడ్డు పెడతాం..

మా రూపం కాస్త కోకిలలా ఉంటుంది! మరో తమాషా విషయం ఏంటంటే.. అచ్చం దానిలానే మాకూ గూడు కట్టుకోవడం రాదు.

* అలా అని మేం వేరే పక్షి గూళ్లలో దొంగచాటుగా వెళ్లి గుడ్లు పెట్టం.

* మేం చెట్ల కొమ్మలు, ఎత్తైన రాళ్లు, ఆఖరుకు భవంతుల మీదా గుడ్లు పెడతాం.

* పేరుకు గుడ్లు అంటున్నాను కానీ.. మాలో చాలా పక్షులు ఓసారి ఒక గుడ్డు మాత్రమే పెడతాయి.

* గుడ్డును పొదగడానికి 30 నుంచి 40 రోజుల సమయం పడుతుంది.

* గుడ్డులోంచి వచ్చిన పిల్ల పెరిగి పెద్దదయ్యేంత వరకు దాని బాగోగులు మాలో ఆడ, మగ పక్షి రెండూ చూసుకుంటాయి.

మా విహారం.. పసిఫిక్‌ తీరం..

మేం ఎక్కువగా పసిఫిక్‌ సముద్రతీరంలో నివసిస్తుంటాం.

* చిన్న చిన్న ద్వీపాల్లో గుడ్లు పెడుతుంటాం.

* చిలీ, కొలంబియా నుంచి న్యూజిలాండ్‌ వరకు మేం ఎక్కువగా కనిపిస్తుంటాం.

* చైనా నుంచి ఇండియా, దక్షిణ మాల్దీవులు, హిందూ మహా సముద్రంలోని దీవులు, సౌతాఫ్రికా తీరాల్లోనూ సందడి చేస్తుంటాం.

* జపాన్‌, మడగాస్కర్‌, మెక్సికో, అట్లాంటిక్‌ మహా సముద్రతీరంలోని కొన్ని ద్వీపాల్లోనూ నివసిస్తుంటాం.

పిట్టకొంచెం జీవితం ఘనం!

మా జీవితకాలం కాస్త ఎక్కువే. మా బంధువొకరు 42 సంవత్సరాలు బతికి రికార్డు సృష్టించారు.

* మమ్మల్ని ఇంట్లో పెంపుడు పక్షుల్లా పెంచుకునే వారూ ఉన్నారు.

* పసిఫిక్‌ మహాసముద్రంలో ప్రయాణించే నావికులకు నేల ఎక్కడ ఉందో తెలుసుకునేందుకు మేం చక్కగా సాయం చేస్తుంటాం.

* చాలా పక్షులు దూరతీరాలకు వలస పోతుంటాయి కానీ మేం మాత్రం అలా కాదు.

* మేమున్న ప్రాంతం నుంచి మేం అటుఇటుగా సుమారు 45 కిలోమీటర్ల పరిధి లోపలే తిరుగుతుంటాం.

* అంటే సముద్రంలో మేం కనిపించామంటే... అక్కడికి దగ్గర్లోనే భూభాగం ఉందన్నమాట! ఇలా నావికులు మమ్మల్ని దిక్సూచిలా వాడుకుంటారన్నమాట.

చేపలంటే ఇష్టం..

ఎక్కువగా మేం తీరంలోనే తచ్చాడుతుంటాం. కానీ గుడ్లు పెట్టే సమయంలో చెట్లు ఉండే ప్రాంతానికి వెళతాం.

* మేము చిన్న చిన్న చేపల్ని ఇష్టంగా తింటాం.

* కింగ్‌ఫిషర్‌ పక్షిలానే మేమూ నీటిలోకి నిట్టనిలువునా దూకి చేపలను వేటాడుతాం.

* మేం చెట్ల కొమ్మలమీదే గూళ్లు లేకుండానే గుడ్లు పెడతాం కదా.. అప్పుడప్పుడు తుపాన్లు, బలమైన గాలుల కారణంగా మా గుడ్లు, పిల్లలు అపాయానికి గురవుతూ ఉంటాయి.