18 గంటలు బజ్జుంటా!

నేనెవరో తెలుసా!

హాయ్‌.. బాగున్నారా. నా పేరు ఫెర్రెట్‌. ఏంటి అలా విచిత్రంగా చూస్తున్నారు. మీరు నన్ను ఎప్పుడూ చూసి ఉండరు కదూ! అందుకే నా గురించి క్లుప్తంగా చెప్పిపోదామని ఇలా వచ్చా.
పేరు: ముందే చెప్పాగా నా పేరు ఫెర్రెట్‌ అని!
ముద్దుపేరు: నాకు ముద్దు పేరు లేదు. కానీ నాపేరుకు లాటిన్‌ భాషలో ‘చిన్నదొంగ’ అని అర్థం. అంటే నా అసలు పేరే నా ముద్దు పేరు అన్నమాట. మళ్లీ మాలో మగవాటిని హోబ్‌ అని, ఆడవాటిని జిల్‌ అనీ పిలుస్తుంటారు.
ప్రత్యేకత: నేను ఎక్కువగా న్యూజిలాండ్‌లో కనిపిస్తుంటా. మేము అడవుల్లో ఉంటాం. కొన్ని చోట్ల మమ్మల్ని పెంపుడు జంతువుల్లానూ పెంచుకుంటారు. కొంతమంది కుందేళ్ల వేటకోసమూ మమ్మల్ని ఉపయోగిస్తుంటారు.
పరిమాణం: నేను నా తోకతో కలుపుకొని దాదాపు 50 సెంటీమీటర్ల పొడవుంటా. నా తోకేమో 13 సెంటీమీటర్ల వరకు ఉంటుంది.

బరువు: దాదాపు 2కిలోలు
నిద్ర: రోజులో 14 నుంచి 18 గంటల వరకు నిద్రపోతా. అలా అని నేను సోమరి అనుకునేరు. నేను చాలా చురుగ్గా ఉంటా.
జీవితకాలం: అయిదు నుంచి తొమ్మిది సంవత్సరాలు
ఆహారం: చిన్న చిన్న జంతువుల్ని వేటాడి తినేస్తా. ఎలుకలు, కుందేళ్లను ఇష్టంగా హాంఁ ఫట్‌ చేస్తా.  
నేను మీకు ఈ విధంగా సాయపడతాను: ఇన్‌ఫ్లూయెంజా, స్వైన్‌ఫ్లూ వ్యాధులు మీ మనుషుల్లాగే మాకూ వ్యాపిస్తాయి. వీటి నివారణ కోసం మా మీద మీ శాస్త్రవేత్తలు పరిశోధనలు చేశారు. ప్రస్తుతం కరోనా నివారణ టీకాల కోసం కూడా మా మీద ప్రయోగాలు చేస్తున్నారు.