ప్రవిక.. పుస్తకమే రాసింది చకచకా!

వయసు నాలుగున్నరేళ్లు... బుడిబుడి అడుగులతో, తడబడే ముద్దు ముద్దు మాటలతో సందడి చేసే వయసు. కానీ ఓ చిన్నారి ఈ వయసులోనే ఏకంగా పుస్తకమే రాసేసింది. ఎంచక్కా వరల్డ్‌ రికార్టూ కొట్టేసింది.. ఆ వివరాలేంటో తెలుసుకుందామా!

ఉత్తరప్రదేశ్‌లోని ఘజియాబాద్‌కు చెందిన ప్రవిక చరిత్ర సృష్టించింది. ఎల్‌కేజీ చదివే వయసులోనే ఓ పుస్తకం రాసింది. దానికి ‘ది లయన్‌ అండ్‌ ది బోన్‌’ అని పేరు పెట్టింది. ఇందుకుగానూ ‘వరల్డ్‌ బుక్‌ ఆఫ్‌ టాలెంట్‌ రికార్డ్స్‌’లో స్థానం సంపాదించింది. మనదేశం నుంచి ఈ ఘనత సాధించిన మొదటి వ్యక్తిగా నిలిచింది.

బొమ్మలూ వేసిందోచ్‌!
కేవలం పుస్తకం రాయడమే కాదు. అందులోని బొమ్మలనూ స్వయంగా ప్రవికే వేసింది. చాలా వేగంగా చిత్రాలు గీయడం ఈ చిన్నారి ప్రత్యేకత. అమ్మ, టీచర్ల సాయంతో పుస్తకానికి ఓ రూపం తీసుకొచ్చింది. ఇంతకీ ఈ పుస్తకంలో ఏముంటుందంటే.. మంచి, మానవత్వం, స్నేహం చుట్టూ కథ తిరుగుతుంది.

బుజ్జి రచయితగా గుర్తింపు
‘వరల్డ్‌ బుక్‌ ఆఫ్‌ టాలెంట్‌’ వాళ్లు గత మూడేళ్లుగా పిల్లలు రాసిన పుస్తకాలను సమీక్షిస్తున్నారు. ఆ వివరాలన్నీ పరిశీలించి ప్రపంచంలోకెల్లా అతిపిన్న వయస్కురాలైన రచయితగా మన ప్రవికను ప్రకటించేశారు. నిజంగా ఇంత చిన్న వయసులోనే బుజ్జాయి ఈ ఘనత సాధించటం నిజంగా గ్రేట్‌ కదూ! భవిష్యత్తులో మరిన్ని విజయాలు సాధించాలని మనమూ ఆల్‌ ది బెస్ట్‌ చెప్పేద్దామా!

• Telugu news
• Writer
• Book
• World record
• Hai bujji