సొర పిట్టు

పాఠక వంట!

కావాల్సినవి: సొరచేప- కిలో, ఉల్లిపాయలు- రెండు, పచ్చిమిర్చి- రెండు, కారం- చెంచాన్నర, ఉప్పు- తగినంత, పసుపు- పావుచెంచా, అల్లంవెల్లుల్లి ముద్ద- చెంచాన్నర, గరంమసాలా- చెంచా, కొబ్బరి- సగం చెక్క, నూనె- తగినంత, కొత్తిమీర- చిన్నకట్ట, కరివేపాకు- రెండు రెబ్బలు, ఉప్పు- తగినంత
తయారీ: ముందుగా చేప ముక్కలని వేడినీటిలో పావుగంటపాటు ఉడకబెట్టాలి. తర్వాత ముక్కలపై ఉండే చర్మం తీసేసి చేత్తో మెత్తగా మెదుపుకోవాలి. దీనిలో ఉప్పు, కారం, పసుపు, కొబ్బరికోరు, అల్లంవెల్లుల్లిపేస్ట్‌, గరంమసాలా వేసి బాగా కలుపుకోవాలి. ఒక్కసారి ఉప్పు, కారం సరిచూసుకోవాలి. ఇప్పుడు కడాయిలో నూనె పోసి వేడెక్కిన తర్వాత అందులో ఉల్లిపాయముక్కలు, పచ్చిమిర్చి, కరివేపాకు వేసి బాగా వేయించిన తర్వాత సొర పిట్టు వేసి సన్నమంట మీద పావుగంట పాటు వేయించుకోవాలి. చివరిగా కొత్తిమీర వేసుకుని దింపుకొంటే సొరపిట్టు రుచిగా ఉంటుంది.

- సూర్యావతి, తూర్పుపాలెం