పెసర పునుగుల పులుసు

పాఠక వంటకం!

కావాల్సినవి: పెసర పునుగులు- పది, ఉల్లిపాయలు-రెండు, పచ్చిమిర్చి-నాలుగు, చింతపండు-నిమ్మకాయంత, వెల్లుల్లిరెబ్బలు-నాలుగు, జీలకర్ర-కొద్దిగా, నీళ్లు-రెండు కప్పులు, కొత్తిమీర-చిన్నకట్ట, పసుపు- పావుటీస్పూన్‌, కారం-రెండు టీస్పూన్లు, ఉప్పు-సరిపడా.

తయారీ: ముందుగా వెల్లుల్లి, జీలకర్రలను మెత్తగా పేస్టు చేసుకోవాలి. బాణలిలో నూనె పోసుకుని వేడెక్కాక ఉల్లిపాయ ముక్కలు, పచ్చిమిర్చి వేయాలి. ఇవి బాగా వేగిన తర్వాత వెల్లుల్లి, జీలకర్ర పేస్టు, పసుపు, కారం, ఉప్పు వేసి నిమిషం పాటు వేయించాలి. ఈ మిశ్రమంలో రెండు కప్పుల నీళ్లు పోసి అయిదు నిమిషాలు ఉడికించాలి. ఇందులో చింతపండు పులుసు పోసి పది నిమిషాలపాటు సన్నని మంట మీద ఉడికించాలి. ఇప్పుడు పెసర పునుగులు వేసి కూరను దించేయాలి. చివరిగా సన్నగా తరిగిన కొత్తిమీరను వేయాలి.

- ఎం. ఆకాంక్ష, హైదరాబాద్‌