వంకాయ, పాలకూర పచ్చడి

పాఠక వంట

కావాల్సినవి: మధ్యస్థంగా ఉన్న వంకాయలు- నాలుగు, ఉల్లిపాయ- ఒకటి, పాలకూర- రెండు కట్టలు, పచ్చిమిర్చి- వంద గ్రాములు, జీలకర్ర- టీస్పూన్‌, వెల్లుల్లి రెబ్బలు- నాలుగు, నూనె- రెండు టీస్పూన్లు, చింతపండు-కొద్దిగా, ఉప్పు-తగినంత.

తయారీ: వంకాయలు, ఉల్లిపాయను ముక్కలుగా  కోసుకోవాలి. పాలకూరను శుభ్రంగా కడిగి పక్కన పెట్టాలి. కడాయిలో నూనె పోసి వేడిచేసి జీలకర్ర వేయాలి. అది చిటపటలాడాక వెల్లుల్లి రెబ్బలు, పచ్చిమిర్చి వేయాలి. అవి కాస్త వేగిన తర్వాత ఉల్లిపాయ, వంకాయ ముక్కలు, పాలకూర, చింతపండు వేసి మెత్తగా అయ్యేంత వరకు మగ్గనివ్వాలి. చల్లారిన తర్వాత మిక్సీలో వేసి పచ్చడి చేయాలి. రోట్లో కచ్చాపచ్చాగా నూరుకున్నా బాగుంటుంది. పచ్చడి కాస్త కారంగా ఉండాలంటేనే వెల్లుల్లి, జీలకర్ర వేసుకోవాలి. వేడివేడి అన్నంలోకి ఈ పచ్చడి చాలా బాగుంటుంది.