పెండలం పులుసు

పాఠక వంట

కావల్సినవి: పెండలం దుంప- ఒకటి, ఉల్లిపాయలు- నాలుగు, పచ్చిమిర్చి- నాలుగు, కారం- చెంచా, ఉప్పు- తగినంత, పసుపు- చిటికెడు, జీలకర్ర- అరచెంచా, వెల్లుల్లి- మూడు రెబ్బలు, నూనె- రెండు చెంచాలు, చింతపండు- నిమ్మకాయంత, కొత్తిమీర- కొద్దిగా
తయారీ: ముందుగా ఉల్లిపాయల్ని చిన్నచిన్న ముక్కలుగా, పచ్చిమిర్చిని పొడవాటి చీరికల్లా కోసుకోవాలి. పెండలం దుంప చెక్కు తీసి నీళ్లల్లో వేసి బాగా కడగాలి. కడాయిని పొయ్యి మీద పెట్టి వేడయ్యాక నూనె పోసి.. అందులో ఉల్లిపాయలు, పచ్చిమిర్చి వేసి వేగనివ్వాలి. చివరిగా పెండలం ముక్కలు వేసి కలిపి మూత పెట్టేయాలి. ముక్కలు మెత్తబడ్డాక ఉప్పు, పసుపు, కారం వేసి ఇంకోసారి కలిపి మూత పెట్టాలి. రెండు నిమిషాలపాటు  మగ్గాక చింతపండు రసం, కొద్దిగా నీళ్లు వేసి మరగనివ్వాలి. కూర ఉడుకుతున్నప్పుడు వెల్లుల్లి, జీలకర్రని ముద్దగా చేసుకుని అందులో వేయాలి. దింపే ముందు కొత్తిమీర వేస్తే...మంచి రుచి వస్తుంది. దీన్ని వేడివేడి అన్నంలో కలుపుకొని తింటే రుచిగా ఉంటుంది.