కాస్తంత ఇంగువ... కొండంత ప్రయోజనం

ఇంగువ ఘమఘుమలులేని తాలింపుకి విలువేముంటుంది? ఆ సువాసన మాత్రమేనా? పోషకాల విషయంలోనూ వంటల్లో ఇంగువది కీలక పాత్ర..
* కార్బోహైడ్రేట్‌లు, పీచు, పొటాషియం, కాల్షియం, వంటి పోషకాలుండటంతోపాటు చర్మ ఆరోగ్యానికి సహకరించే నూనెలు ఇందులో పుష్కలంగా ఉన్నాయి. అజీర్తి, శ్వాసకోశ సమస్యలు, బీపీ, నెలసరి సమస్యలకు ఇంగువ చక్కని పరిష్కారం. ఊబకాయం రాకుండా చూస్తుంది.
* మనసు బాగోలేనప్పుడు ఇంగువ వేసిన వంటకాలు తింటే మూడ్‌ మారుతుందని అధ్యయనాలు చెబుతున్నాయి. రక్తహీనత నివారించి ఏకాగ్రతను పెంచుతుంది. అలసటను తగ్గిస్తుంది. ఒత్తిడి లేకుండా చేస్తుంది.
* ఎముకలు, దంతాల ఆరోగ్యాన్ని కాపాడుతుంది. నలభై దాటిన మహిళల్లో ఎముకలు బలహీనం అవుతుంటాయి. అటువంటి వారికి ఇంగువ మంచి ఉపశమనం ఇస్తుంది.

* ఆస్తమా, బ్రాంకైటిస్‌, న్యుమోనియా, దగ్గు, జలుబు వంటి శ్వాసకోశ సమస్యల నుంచి ఉపశమనం కలిగిస్తుంది.
* మహిళల్లో ప్రొజెస్టెరాన్‌ హార్మోన్‌ని ఉత్పత్తి చేసి ప్రసవ సమయంలో అధిక రక్తస్రావం కాకుండా తగ్గిస్తుంది. నెలసరి క్రమం తప్పకుండా చేసి, నొప్పిని అదుపు చేస్తుంది.
* గోరు వెచ్చని నీటిలో కొన్ని చుక్కల ఇంగువ నూనె వేసి.. పుక్కిలిస్తే దానిలోని యాంటీ బ్యాక్టీరియల్‌, యాంటీ సెప్టిక్‌ గుణాలు దంత క్షయం, చిగుళ్ల ఇన్ఫెక్షన్‌, రక్తస్రావం, నోటి దుర్వాసన రాకుండా చూస్తాయి. ఈ ప్రయోజనాలని అందుకోవడం కోసం ఇంగువతో చేసిన హింగ్‌ గోలీ హింగ్‌ పెడాని కొన్నిప్రాంతాల్లో ఇష్టంగా తింటారు.