ఎంతెంత.. రుచింత!

ఆరోగ్యానికి మేలు...

* శీతాకాలంలో జీవక్రియలు అంత చురుగ్గా ఉండవు. ఫలితం.. శరీరంలో వ్యాధినియంత్రణ శక్తి తగ్గి... దగ్గు, జలుబు, జ్వరం వంటివి సులభంగా దాడి చేస్తాయి. ఈ సమస్యల నుంచి ఉపశమనం కలిగిస్తుంది పచ్చిచింత. వ్యాధినిరోధక విటమిన్‌గా చెప్పే థయామిన్‌ రోజువారీ అవసరాల్లో 36 శాతం తీరుస్తుంది.
* చింతలో డైటరీ ఫైబర్‌, యాంటీఆక్సిడెంట్లు పుష్కలంగా ఉంటాయి. శరీరానికి హానిచేసే ఫ్రీరాడికల్స్‌ని సమర్థంగా ఎదుర్కొంటుంది.  అందుకే శరీరంలోని వ్యర్థాలు నివారించడానికి చింత బాగా ఉపయోగపడుతుంది.
* ఇనుము, ఫోలిక్‌యాసిడ్‌, ఎ విటమిన్‌ వంటి విటమిన్లు స్త్రీలల్లో రక్తహీనత రాకుండా చూస్తాయి.
* దీనిలోని పొటాషియం గుండె జబ్బులు రాకుండా చూస్తుంది.

లేత చింతకాయలు అయితే చెక్కుకూడా తీసుకోవాల్సిన అవసరం లేదు. రోట్లో నేరుగా దంచుకోవచ్చు. గింజపట్టినవి అయితే నిలువుగా చీల్చి పప్పు తీసేసి పైపైన చెక్కు తీసుకుంటే సరిపోతుంది.

చింతతొక్కు ఊరుబిండి

కావాల్సినవి: చింతతొక్కు- ఒక కప్పు, పల్లీలు- కప్పు, పచ్చిమిర్చి- ఐదు, ఉల్లిపాయ ముక్కలు- అరకప్పు
తయారీ: ఒక పాత్రలో ముందుగా పచ్చిమిర్చి, ఉల్లిపాయలని ఉడికించి పెట్టుకోవాలి. మరో పాత్రలో పల్లీలని దోరగా వేయించుకుని పక్కన పెట్టుకోవాలి. రోట్లో పల్లీలు, ఉడికించిన ఉల్లి, పచ్చిమిర్చిలను కచ్చాపచ్చాగా దంచుకోవాలి. దీనికి చింతతొక్కుని కూడా జోడించి మళ్లీ ఒకసారి దంచుకుంటే ఊరుబిండి రెడీ.

చింతకాయ రొయ్యల కూర  

కావాల్సినవి: చింతకాయలు- పావుకిలో, పచ్చిరొయ్యలు- అరకిలో, పసుపు- కొద్దిగా, కారం- రెండు చెంచాలు, నూనె- తగినంత, ఉల్లిపాయ తరుగు- కప్పు, దంచిన అల్లం- కొద్దిగా, ఉప్పు- తగినంత
తయారీ: ముందుగా చింతకాయల్ని నిలువుగా చీల్చి అందులోని పప్పు తీసేయాలి. వీటిని రోట్లోకానీ మిక్సీలో కానీ వేసి పసుపు, ఉప్పు వేసుకుని దంచుకుని పక్కన పెట్టుకోవాలి.
ఒక మూకుట్లో నూనె పోసుకుని అందులో ఉల్లిపాయల తరుగు, పసుపు వేసుకుని దోరగా వేయించుకోవాలి. ఇప్పుడు శుభ్రం చేసిన పచ్చిరొయ్యలని తీసుకుని నూనెలో వేసి మగ్గించుకోవాలి. దంచిన అల్లం కూడా వేసుకుని బాగా కలిపి అందులో ఇందాక మనం నూరిన చింతకాయ మిశ్రమాన్ని వేసి కలియ తిప్పాలి. కాసేపటికి మెత్తగా ఉడుకుతుంది. ఇప్పుడు కారం కూడా వేసి కొద్దిగా నీరు పోసుకుని మూత పెట్టేయాలి.  చింత పులుపు రొయ్యలకు పట్టి ఆ రుచి అద్భుతంగా ఉంటుంది. ఇష్టమైన వాళ్లు కూర ఉడుకుతున్నప్పుడు కొద్దిగా ధనియాల పొడి వేసుకోవచ్చు.

కొయ్యింగతో కలిసి..

కావాల్సినవి: కొయ్యింగ చేప- ఒకటి(అరకిలో), చింతకాయలు- 200గ్రా, పచ్చిమిర్చి- పది, ధనియాలు- చెంచా, జీలకర్ర- అరచెంచా, అల్లం ముక్క- కొద్దిగా, ఉల్లిపాయలు- మూడు, నూనె, ఉప్పు- తగినంత
తయారీ: పప్పు తీసిన చింతకాయలు, ధనియాలు, జీలకర్ర, ఉప్పు రోట్లో కానీ మిక్సీలో కానీ వేసి బరకగా చేసుకోవాలి.
మూకుడులో ముందుగా చింతకాయ పేస్ట్‌, ఆపై పసుపు, ఉప్పు, కారం వేసుకోవాలి. ఆపై చేపలు కూడా వేసి నూనె వేయాలి. కొద్దిగా నీరు పోసి అప్పుడు పొయ్యి వెలిగించి ఓ మోస్తరు సెగపై ఉడికించుకోవాలి. కూర దగ్గరగా వచ్చి బుడగలు వస్తూ నూనె పైకి తేలుతున్నప్పుడు దింపుకుని కొత్తిమీర చల్లుకోవాలి.

చేపలు, చింతకాయలు కలిపివండేటప్పుడు మట్టిపాత్రల్లో వండితే వాటి రుచి బాగుంటుంది.

చేదుపరిగలతో..

కావాల్సినవి: చేదుపరిగలు- పావుకిలో, చింతకాయలు- 150 గ్రా, ఉల్లిపాయలు- రెండు, పచ్చిమిర్చి- ఆరు, నూనె- తగినంత, ధనియాలు, జీలకర్ర - అరచెంచా చొప్పున, అల్లం- కొద్దిగా, ఉప్పు- సరిపడేంత
తయారీ: ముందుగా మిక్సీలో ఉల్లిపాయలు ముక్కలూ, ధనియాలు, జీలకర్ర, అల్లం వేసి పేస్ట్‌లా చేసుకోవాలి. ఆ తర్వాత చింతకాయ ముక్కలని కూడా బరకగా మిక్సీ పట్టాలి. వెడల్పాటి మూకుడు తీసుకుని అందులో ముందుగా చింతకాయ మిశ్రమం, తర్వాత ఉప్పు, కారం, పసుపు, ఆపై చేపలని పొరలుగా వేసుకుని, ఆపై నూనె, కొద్దిగా నీరు పోసి అప్పుడు పొయ్యి మీద పెట్టాలి. చిన్నసెగ మీద పెట్టుకుంటే కూర కాసేపటికి ఇగిరిపోతుంది. కూరని గరిటెతో కదిపితే చేపలు విరిగిపోతాయి. కాబట్టి మొత్తంగా మూకుడుని కదిపితే సరిపోతుంది. చివరిగా కొత్తిమీర చల్లుకుంటే సరి.

మిడుసు  

కావాల్సినవి: పెరుగు- రెండున్నర కప్పులు, చింతతొక్కు- ఒక కప్పు, ఉల్లిపాయ తరుగు- నిలువుగా తరిగినవి పావుకప్పు, తాలింపు గింజలు, కరివేపాకు- ఒక రెబ్బ, నూనె- కొద్దిగా, ఇంగువ, పసుపు- కొద్దిగా
తయారీ: ఒక గిన్నెలో తాజా పెరుగు తీసుకుని దీనిలో చింతతొక్కుని వేసి బాగా కలుపుకోవాలి. చింతతొక్కులో ముందుగానే ఉప్పు ఉంటుంది కాబట్టి అవసరం అనిపిస్తే తప్ప వేసుకోవాల్సిన అవసరం లేదు. దీనిని పక్కన పెట్టుకుని ఒక గిన్నెలో నూనె పోసుకుని అందులో తాలింపు గింజలూ, కరివేపాకూ, ఉల్లిపాయలు, పసుపు, ఇంగువ వేసి తాలింపు పెట్టుకోవాలి. ఈ పోపు చల్లారాక ఇందాక మనం తయారుచేసిన పెరుగులో వేసుకుని కలుపుకోవాలి. చింతతొక్కు మిడుసు సిద్ధం.