పెసర కుడుములు వహ్వా అనిపించాలంటే..

పెసర కుడుములు చేయాలని ప్రయత్నిస్తే అంత బాగా రాలేదు. ఎలా చేస్తే ఎక్కువ రుచిగా ఉంటాయో కాస్త చెప్పండి!

• వినాయక చవితి ప్రసాదాలన్నీ రుచీ, ఆరోగ్యంతో కూడినవే. పెసర కుడుములూ అంతే. ఇవి మరింత రుచిగా ఉండాలంటే.. పెసలు మంచి సువాసన వచ్చేదాకా వేయించి, తగినన్ని నీళ్లు పోసి మీడియం ఫ్లేమ్‌ మీద ఉడికించుకోవాలి.
• బెల్లం తురుములో అతి కొద్ది నీళ్లు పోసి, దగ్గర పడే దాకా కలియతిప్పి, ఇందులో ఉడికించిన పెసర ముద్ద వేయాలి.
• బియ్యప్పిండిని మీడియం ఫ్లేమ్‌ మీద గట్టి ముద్దలా అయ్యేదాకా కలియ తిప్పుతూ ఉడికించుకోవాలి. నచ్చితే బ్రౌన్‌ రైస్‌ పిండి కూడా వాడుకోవచ్చు.
• స్టఫ్ఫింగ్‌లో యాలకులపొడి వేయాలి. దాల్చినచెక్క పొడి, జాజికాయ పొడి కూడా వేస్తే.. భిన్నమైన రుచి వస్తుంది.
• ఉడికించిన బియ్యప్పిండి చిన్నగా పరిచి.. దానిమీద పెసరముద్దను ఉంచి, విస్తరాకులో చుట్టాలి. విస్తరాకు లేదా అరటి ఆకును ఉపయోగిస్తే.. ఆ పరిమళం, రుచి చాలా బాగుంటాయి.
• విస్తరాకును ఒక నిమిషం నీళ్లలో ఉంచితే ఆకు మధ్యకి మడిచినా చిరగదు. అలా ఆకును మరో మడత వేసి ఇడ్లీ కుక్కర్లో హై ఫ్లేమ్‌ మీద 5 నిమిషాలు, లో ఫ్లేమ్‌ మీద ఇంకో 5 నిమిషాలు ఉడికించాలి.

పవన్‌ సిరిగిరి, చెఫ్‌, హైదరాబాద్‌