ఇంట్లోనే సులువుగా క్రిస్పీ కార్న్‌!

మా పిల్లలకు ‘క్రిస్పీ కార్న్‌’ అంటే చాలా ఇష్టం. రెస్టారెంట్‌ స్టయిల్లో చేసేందుకు టిప్స్‌ చెప్పండి!

• కార్న్‌ ఎండితే రుచిగా ఉండదు. అందువల్ల తాజాది ఎంచుకోండి. అప్పుడే చక్కగా వేగి కరకరలాడుతుంది. దీనికి మామూలు మొక్కజొన్నల కంటే స్వీట్‌ కార్న్‌ బాగుంటుంది.
• ఫ్రోజెన్‌ కార్న్‌ లేదా తాజా కార్న్‌.. ఏదైనా వాడుకోవచ్చు. తాజావైతే పూర్తి గింజ వచ్చేలా ఒలవాలి.
• కార్న్‌ నీళ్లలో వేసి హై ఫ్లేమ్‌ మీద మూత పెట్టకుండా 80% ఉడికించాలి. అంటే కొద్దిగా పలుకుగా ఉండాలి. ఒక గింజ నోట్లో వేసుకుంటే తెలిసిపోతుంది.
• ఉడికించాక అందులో నీటిని వెంటనే వంపేసి, చన్నీళ్లు పోస్తే మరింత మెత్తబడవు. వాటిని చల్లారనిచ్చి కార్న్‌ ఫ్లోర్‌ జల్లాలి. వేడి మీద అయితే- ఎంత పిండి వేసినా చాలదు. కార్న్‌ ఫ్లోర్‌ ఎక్కువైతే పకోడీలా తయారవు తుంది. కొన్ని నీళ్లు చిలకరిస్తే.. పిండి గట్టిగా పట్టుకుంటుంది. నీళ్లు ఎక్కువైతే కరకరలాడవు.
• నూనె వేశాక.. ఒక్కోసారి పేలతాయి. అందుకే కార్న్‌ వేగేటప్పుడు కడాయి మీద మూత పెడితే నూనె చిందదు. ఈ స్టార్టర్‌ వేడివేడిగా తింటే చాలా రుచిగా ఉంటుంది.

 పవన్‌ సిరిగిరి, చెఫ్‌ హైదరాబాద్‌