అదే శాంతికి చిరునామా

‘అనన్యే నైవ యోగేన మాం ధ్యాయంత ఉపాసితే’ అంటోంది భగవద్గీత. ఎవరైతే అన్య చిత్తం గాక అనన్య చిత్తంతో ఉపాసిస్తారో వారిని సంసార సాగరం నుంచి కృష్ణపరమాత్ముడు ఉద్ధరిస్తాడన్నది భావం. పొలం శుద్ధి చేయకుండా విత్తనాలు మొలకెత్తవు. పునాది గట్టిగా లేకుంటే సౌధం నిలవదు. అలాగే మనసు శుద్ధి చేసుకోకుండా దైవ సాక్షాత్కారం లభించదు. మన ధ్యానం, ఉపాసన ఆనందకర విషయాలే గానీ బలవంతంగా చేసేవి కాదు. ఎవరి కోసమో భక్తి ముసుగు వేయకూడదు. ఆ తాదాత్మ్యం ఎవరికి వారు అనుభవించాలి. అన్యచిత్తం లేకుండా ధ్యానించడమే అనన్యయోగం.
శత్రుమిత్రులు, మానావమానాలు, శీతోష్ణాలు, నిందాస్తుతులు, సుఖదుఃఖాల్లో సమస్థితి చూపడం, ఎలాంటి కోరికలూ లేకపోవడం, మౌనం, నిశ్చలబుద్ధి, నిర్మలభక్తి.. ఇవే తనకు అత్యంత ఇష్టమన్నది భగవద్వచనం. క్షణక్షణం పరివర్తన చెందే సమాజంలో ఈ గుణాలు అలవరుచుకుంటే శాంతి సంతృప్తులతో జీవించవచ్చు. దైవసాక్షాత్కార అనుభూతి పొందవచ్చు.

 శివలెంక ప్రసాదరావు