ఎంత డేట్‌ ప్రేమయో..!

డేటింగ్‌ అంటే? మనసు విప్పి ఒకర్నొకరు అర్థం చేసుకోవడం.. రొమాన్స్‌లో తేలిపోవడం... ఎవరికి నచ్చిన అర్థం వాళ్లకి ఉంటుంది. ఇవేకాదు ఈ మధ్య ‘లాంగ్‌ డిస్టెన్స్‌’, ‘జూమ్‌ డేటింగ్‌’ అని కొత్తగా వినపడుతున్నాయి.ఈ జాబితా ఇంతటితో ఆగదు అంటోంది ప్రముఖ డేటింగ్‌ యాప్‌ బంబుల్‌. డేటింగ్‌ చేసేవాళ్ల మనస్తత్నాన్ని బట్టి కొత్త ట్రెండ్స్‌ రాబోతున్నాయట. అవేంటంటే..

హార్డ్‌బాలింగ్‌: వీళ్లు డేటింగ్‌కి ఓకే. కానీ అనవసరంగా సమయం వృథా చేయడానికి ఇష్టపడరు. ప్రేమ, రొమాన్స్‌.. అవతలివాళ్ల నుంచి కోరుకున్నది దక్కదని తేలిపోతే వెంటనే బంధానికి ‘బై’ చెప్పేస్తారు. జంకు, మొహమాటాలేం ఉండవు. ఈ ట్రెండ్‌నే ‘డేటింగ్‌ లైక్‌ సీఈవో’ అని కూడా అంటారు.

ఆస్ట్రో లవ్‌: మేషం, తుల రాశుల వాళ్లు డేటింగ్‌ చేయనే కూడదనేది నియమం. జాతకాలపై నమ్మకం ఉన్నవాళ్ల సంగతి లెండి ఇది! ఇది ఇంకా ముందుకెళ్లి ఫలానా రాశి వాళ్లు ఆ రాశి వారినే లవ్వాడాలి, డేటింగ్‌ చేయాలి అనే ధోరణి పెరిగిపోతుందట. ఎందుకంటే డేటింగ్‌ యాప్‌లలో ‘ఆస్ట్రాలజీ బ్యాడ్జ్‌’ అనే కొత్త ఫీచర్‌ జోడించడం వల్ల కలిగే ప్రభావం ఇది.

స్లో డేటింగ్‌: డేట్‌ అంటేనే అమ్మాయి, అబ్బాయి మధ్య ఏ సంగతైనా ఫటాఫట్‌ తేలిపోయే విషయం. దీనికి వ్యతిరేకం స్లో డేటింగ్‌. ఇద్దరి మధ్య వ్యవహారం మెల్లిగా వేడెక్కుతుంది. ఎప్పుడోగానీ కలుసుకోరు. అన్నీ నచ్చాక గానీ జట్టు కట్టరు. ఉన్నవాటిలో ఇదే ఉత్తమం అంటారు సైకాజిస్టులు.
వర్చువల్‌ డేటింగ్‌: ప్రస్తుతం కుర్రకారు అత్యధికంగా మొగ్గుచూపుతున్న ట్రెండ్‌. వీడియో, ఫోన్‌ కాల్స్‌ ద్వారా అభిప్రాయాలు పంచుకుంటారు. ఆన్‌లైన్‌లో కలిసి గేమ్స్‌ ఆడుతుంటారు. సినిమాలు చూస్తారు. అన్నీ ఓకే అయ్యాకే భౌతికంగా కలుసుకోవడం.