బండి మండిపోకుండా..

యువాహనం

గమ్యం చేర్చే బైక్‌, కారులాంటివి.. కేవలం వాహనాలే కాదు.. యువతకి ప్రియనేస్తాలు కూడా. మరి ఎండలు మండిపోతున్న ఈ సమయంలో మన ఫ్రెండ్స్‌ హీటెక్కిపోకుండా జాగ్రత్తలు తీసుకోవాలిగా!

*  వేసవిలో బండి కూల్‌కూల్‌గా ఉండాలంటే ఎండలో నిలపకుండా ఉంటే సగం పని పూర్తైనట్టే. కారు అయితే క్యాబిన్‌ నుంచి వేడి వెళ్లిపోవడానికి అద్దాలను కాస్త కిందికి దించి ఉంచాలి.

*  ఈ సమయంలో కారులో ఏసీ వాడకం ఎక్కువ. దాంట్లో ఏదైనా సమస్య తలెత్తితే పెద్ద ఇబ్బందే. ఎందుకైనా మంచిది ముందే ఏసీని ఒకసారి సర్వీసింగ్‌ చేయిస్తే అనవసర ఇబ్బందులు, సమస్యల నుంచి తప్పించుకోవచ్చు.

* మోటార్‌సైకిల్‌, కారు టైర్లలో గాలి ఎక్కువైనా, తక్కువైనా ఇబ్బందే. ఒక్కోసారి ప్రమాదకరం కూడా. ఈ సీజన్‌లో టైర్‌ ప్రెషర్‌ని తరచూ పరీక్షిస్తూ తగినంత ఉండేలా చూసుకోవాలి.

* రేడియటర్‌, కూలంట్‌లు, ట్రాన్స్‌మిషన్‌ ఫ్లూయిడ్లు, బ్యాటరీ ఇవి బండి సాఫీగా కదలడానికి తోడ్పడతాయి. ఇవి సరిగా లేకపోతే.. వాహనం హీటెక్కిపోయి మంటలు చెలరేగే ప్రమాదం ఉంది. వీటిని ఎప్పటికప్పు డు పరీక్షిస్తుండాలి. మరమ్మతులు చేయించాలి.