Gold Imports: భారీగా పెరిగిన పసిడి దిగుమతులు

దిల్లీ: ఏప్రిల్‌-సెప్టెంబరు మధ్య దేశంలో పసిడి దిగుమతులు భారీగా పెరిగి 24 బిలియన్‌ డాలర్ల(రూ.58,572.99 కోట్లు)కు చేరుకున్నాయి. అంతక్రితం ఏడాది ఇదే సమయంలో ఇవి 6.8 బిలియన్‌ డాలర్లుగా ఉన్నాయి. అలాగే క్రితం ఏడాది సెప్టెంబరు నెలలో 601.4 మిలియన్‌ డాలర్లుగా ఉన్న బంగారం దిగుమతులు ఈ ఏడాది సెప్టెంబరులో 5.11 బిలియన్‌ డాలర్లకు చేరుకున్నాయి.

వెండి దిగుమతులు ఏప్రిల్‌-సెప్టెంబరులో 15.5 శాతం తగ్గి 619.3 మిలియన్ డాలర్లకు పరిమితమయ్యాయి. గత ఏడాది సెప్టెంబరు నెల(9.23 మిలియన్‌ డాలర్లు)తో పోలిస్తే ఈ ఏడాది అదే నెలలో వెండి దిగుమతులు 552.33 మిలియన్‌ డాలర్లకు పెరిగాయి. పసిడి దిగుమతులు భారీగా పెరగడంతో దేశ వాణిజ్య లోటు గత నెలలో 22.6 బిలియన్‌ డాలర్లకు చేరింది. ఏటా భారత్‌ 800-900 టన్నుల పసిడిని దిగుమతి చేసుకుంటుందన్న విషయం తెలిసిందే. మరో వైపు, రత్నాభరణాల ఎగుమతులు ఏప్రిల్‌-సెప్టెంబరులో 8.7 బి. డాలర్ల నుంచి 19.3 బిలియన్‌ డాలర్లకు చేరాయి.