బంగారం ధరలు , స్టాక్ మార్కెట్లు వ్యతిరేక దిశలో పయనిస్తాయి. అనేక సందర్భాల్లో స్టాక్ మార్కెట్ పెరుగుతున్నప్పుడు ,బంగారం ధరలు తగ్గడం, లేదా స్టాక్ మార్కెట్ పడుతున్నప్పుడు , మదుపరులు తమ పెట్టుబడుల రక్షణ కోసం బంగారం వైపు వెళ్తారు . అందువలన ఆర్ధిక సంక్షోభం లేదా మాంద్యం సమయాల్లో బంగారం ధరలు పెరగడం జరుగుతుంటాయి .

జాతీయ , అంతర్జాతీయ ఆర్ధిక, ప్రాదేశిక సమస్యల సమయంలో మదుపరులు తమ సురక్షితమైన పెట్టుబడి కోసం బంగారం వైపు వెళతారు. ఎందుకంటే బంగారం ధరలలో కొద్దిగా హెచ్చుతగ్గులుండవచ్చు గానీ, అసలు విలువ లేని పెట్టుబడిగా మారదు .

2000 నాటి ఆర్ధిక మాంద్యం సమయంలో అభివృద్ధి చెందిన దేశాల్లో బంగారం ధరలు పెరిగాయి . అలాగే న్యూ యార్క్ లోని వరల్డ్ ట్రేడ్ సెంటర్ మీద దాడి, మిడిల్ ఈస్ట్ దేశాలలో యుఎస్ సైనిక చర్యలు, లాంటి అనేక సందర్భాలలో స్టాక్ మార్కెట్లు పడిపోయినప్పుడు, బంగారం ధరలలో పెరుగుదల ఏర్పడింది .

ఆనాటి అంతర్జాతీయ మార్కెట్ లో నెలకొన్న ఆర్ధిక అనిశ్చితుల కారణంగా , 2001 నాడు ట్రాయ్ ఔన్స్ (31.1 గ్రా ) ల బంగారం ధర యుఎస్ డాలర్ ($) 271.04 ఉంటే, 2002 నాటికి $309.73 గాను, 2003 నాటికి $363.38 గానే పెరిగింది. అదే 2006 నాటికి $600 గా పెరిగింది.

2008 లో లేహ్ మాన్ (Lehman) బ్రదర్స్ పతనం కారణంగా సంభవించిన ఆర్ధిక మాంద్యం వలన స్టాక్ మార్కెట్లు తీవ్రంగా నష్టపోయాయి. సెన్సెక్స్ 50 శాతం వరకు కోల్పోయింది . ఇది బంగారం ధరల పెరుగుదలకు కారణమైంది . 2008 లో $ 700 ఉన్న ట్రాయ్ ఔన్స్ బంగారం , 2011 నాటికి $ 1,900 కు చేరింది . ఆ తరువాత స్టాక్ మార్కెట్లు పుంజుకోవడం మొదలవగానే, బంగారం ధరలలో స్థిరత్వం ఏర్పడింది .

ప్రపంచంలోని అతిపెద్ద ఆర్ధిక వ్యవస్థలైన యుఎస్ - చైనా ల మధ్య 2018 లో నెలకొన్న వాణిజ్య యుద్ధం, ఒకరిపై ఒకరు విధించిన సుంకాల నేపథ్యంలో మళ్ళీ స్టాక్ మార్కెట్లు అనిశ్చితిని ఎదుర్కొన్నాయి. దీంతో బంగారం ధరలకు మళ్ళీ రెక్కలొచ్చాయి. 2017 లో ట్రాయ్ ఔన్స్ $ 1,257.12 గా ఉన్న బంగారం 2019 నాటికి $ 1,392.6 గా పెరిగింది .

పెట్టుబడుల కోసం అనేక పథ‌కాలు ఉన్నప్పటికీ , ఆర్ధిక మాంద్యం వంటి సమయాల్లో నగదు లభ్యత, తొందరగా సొమ్ముచేసుకోగల వీలున్న బంగారాన్ని ఇష్టపడతారు.

అదే రియల్ ఎస్టేట్ అయితే, కొనుగోలుదారులు దొరకక పోవచ్చు, లేదా తగిన ధర రాకపోవచ్చు. అదే డెట్ పెట్టుబడులయితే లాక్-ఇన్ పీరియడ్ వల్ల నగదు పొందలేకపోవచ్చు. పెట్టుబడులలో వైవిధ్యం కోసం బంగారంలో కూడా మదుపుచేయొచ్చు. అత్యవసర సమయాల్లో నగదుగా మార్చుకొవాలంటే బంగారం ఉపయోగిస్తుంది . అయితే మీ మొత్తం పోర్ట్ ఫోలియో లో 10-15 శాతం కన్నా మించకుండా ఉండేటట్లు చూసుకొవాలి