‘భారత్‌లో తయారీ’కి జపాన్‌ దన్ను

దిల్లీ: ‘భారత్‌లో తయారీ’ని ప్రోత్సహించే దిశగా కేంద్ర ప్రభుత్వం ప్రకటిస్తున్న ఉత్పత్తి ఆధారిత ప్రోత్సాహకాల(పీఎల్‌ఐ) పథకానికి జపాన్‌ నుంచి సహకారం అందే అవకాశం ఉందని కేంద్రం భావిస్తోంది. మొత్తం 13 కీలక రంగాలకు ఈ పీఎల్‌ఐ పథకం ప్రకటించాలని నిర్ణయించిన విషయం తెలిసిందే. వీటిలో టెలికాం, ఆహార శుద్ధి, వైద్య పరికరాలు, వాహన-వాటి విడిభాగాలు, సోలార్‌ వంటి కీలక రంగాలు ఉన్నాయి. ఈ రంగాల్లో తయారీపై జపాన్‌కు మంచి అనుభవం, నైపుణ్యం ఉన్న విషయం తెలిసిందే. ఈ నేపథ్యంలో భారత్‌ ప్రకటిస్తున్న పీఎల్‌ఐ పథకాల్లో జపాన్‌ అత్యంత ఆసక్తి కనబరిచే అవకాశం ఉన్నట్లు భావిస్తున్నామని డిపార్ట్‌మెంట్‌ ఫర్‌ ప్రమోషన్‌ ఆఫ్‌ ఇండస్ట్రీ అండ్‌ ఇంటర్నల్‌ ట్రేడ్‌ (డీపీఐఐటీ) కార్యదర్శి గురుప్రసాద్‌ మొహపాత్రా తెలిపారు. ఫిక్కీ నిర్వహించిన ఇండియా-జపాన్‌ బిజినెస్ కోఆపరేషన్‌ కమిటీ 44వ సంయుక్త సమావేశంలో ఆయన ఈ వ్యాఖ్యలు చేశారు. జపాన్‌లోనూ కంపెనీలకు రాయితీలు, ప్రోత్సాహకాలు ప్రకటించిన విషయాన్ని గుర్తుచేశారు. అలాగే ఇటీవల ఇరు దేశాల మధ్య పారిశ్రామిక భాగస్వామ్యం బలపడుతోందని తెలిపారు. ఈ పరిణామాల నేపథ్యంలో జపాన్‌ కంపెనీలు భారత్‌లో పెట్టుబడులు పెట్టేందుకు ఆసక్తి చూపే అవకాశం ఉందన్నారు.

ఇవీ చదవండి...

గూగుల్‌ పే.. గోప్యత మీ ఇష్టమే

గృహరుణం.. వడ్డీ రేట్లు..