రూ.79,999కే ఓలా విద్యుత్తు స్కూటర్‌

దిల్లీ: ఓలా ఎలక్ట్రిక్‌ సంస్థ సరికొత్త ఎస్‌1 ఎయిర్‌ విద్యుత్తు స్కూటర్‌ను ఆవిష్కరించింది. ప్రారంభంలో రూ.79,999కే అందిస్తామని సంస్థ సీఈఓ భవీశ్‌ అగర్వాల్‌ శనివారం చెప్పారు. 2.5 కిలోవాట్‌ అవర్‌ బ్యాటరీ ప్యాక్‌, 4.5 కేడబ్ల్యూ హబ్‌ మోటార్‌ అమర్చిన ఈ స్కూటర్‌ గరిష్ఠంగా 85 కిలోమీటర్ల వేగంతో ప్రయాణిస్తుందన్నారు. 4.3 సెకన్లలోనే 40 కిలోమీటర్ల వేగాన్ని అందుకుంటుందని చెప్పారు.
వచ్చే ఏడాది విద్యుత్తు మోటార్‌సైకిల్‌ను ఆవిష్కరిస్తామని భవీశ్‌ వెల్లడించారు. గతేడాది ఆగస్టులో తొలి విద్యుత్తు స్కూటర్లను ఆవిష్కరించిన సంస్థ, ఇప్పటివరకు లక్షకు పైగా వాహనాలను విక్రయించిందన్నారు. రోజుకు 1,000 స్కూటర్లను తయారు చేస్తున్నామని, ఈ సామర్థ్యం రాబోయే 6-8 నెలల్లో మరింత పెరుగుతుందని తెలిపారు.