2023-24లో భారత వృద్ధి 6%

ఎస్‌అండ్‌పీ అంచనాలు యథాతథం

దిల్లీ: ప్రస్తుత ఆర్థిక సంవత్సరంలో భారత వృద్ధి రేటు 7 శాతంగా నమోదయ్యే అవకాశం ఉందని ఎస్‌ అండ్‌ పీ గ్లోబల్‌ రేటింగ్స్‌ తెలిపింది. ఏప్రిల్‌ 1 నుంచి ప్రారంభం కానున్న వచ్చే ఆర్థిక సంవత్సరానికి(2023-24) వృద్ధి అంచనాల్లో ఎలాంటి మార్పు చేయకుండా 6 శాతంగానే కొనసాగిస్తున్నట్లు పేర్కొంది. 2024-25, 2025-26లో 6.9 శాతంగాను, 2026-27లో 7.1 శాతంగా వృద్ధి నమోదయ్యే అవకాశం ఉందని అంచనా వేసింది. 2024-26 మధ్య సగటున వృద్ధి రేటు 7 శాతంగా ఉంటుందని పేర్కొంది. ద్రవ్యోల్బణం ప్రస్తుత ఆర్థిక సంవత్సరంలోని 6.8 శాతం నుంచి వచ్చే ఆర్థిక సంవత్సరంలో 5 శాతానికి తగ్గుతుందని పేర్కొంది. అయితే వాతావరణపరమైన అంశాల రీత్యా ద్రవ్యోల్బణం మరింత పెరిగే అవకాశాలు లేకపోలేదని పేర్కొంది. ఈ నేపథ్యంలో కీలక రేట్లను ఆర్‌బీఐ మరింత పెంచే అవకాశం ఉందని తెలిపింది. చైనా ఆర్థిక వ్యవస్థ ఈ ఏడాది గాడిలో పడే అవకాశం ఉందని వివరించింది. ఈ ఏడాది ఆ దేశ వృద్ధి రేటు 5.5 శాతంగా నమోదు కావొచ్చని తెలిపింది. 2023లో అమెరికా, ఐరోపా ప్రాంతం వృద్ధి నెమ్మదించొచ్చని.. వరుసగా 0.7 శాతం, 0.3 శాతం మేర వృద్ధిరేటు నమోదయ్యే అవకాశం ఉందని వివరించింది.