నిధులు సమీకరించే యోచనలో సైయెంట్‌?

ఈనాడు, హైదరాబాద్‌:  హైదరాబాద్‌కు చెందిన ఇంజినీరింగ్‌, ఐటీ, డిజైన్‌ సేవల సంస్థ సైయెంట్‌ లిమిటెడ్‌ తన విస్తరణ అవసరాల కోసం నిధులు సమీకరించే యోచనలో ఉంది. కంపెనీ సత్వర అభివృద్ధికి దోహదపడే ఇతర వ్యాపార సంస్థలను కొనుగోలు చేయాలని (ఇన్‌-ఆర్గానిక్‌ గ్రోత్‌), అందుకు కొంతమేరకు నిధులు సమకూర్చుకోవాలని యాజమాన్యం భావిస్తోంది. సైయెంట్‌ లిమిటెడ్‌కు ప్రస్తుతం అప్పు లేదు. దీనికి తోడు సమీప భవిష్యత్తులో మంచి వృద్ధి నమోదు చేసే అవకాశం ఉన్నట్లు అంచనా. అందువల్ల వ్యూహాత్మకంగా కొన్ని సంస్థలను కొనుగోలు చేసి, ఇంకా అభివృద్ధి పథంలో నిలవాలనేది కంపెనీ యాజమాన్యం ఆలోచనగా తెలుస్తోంది. దీనికితోడు సంస్థాగతంగా పునర్‌వ్యవస్థీకరణ చేపట్టాలని, అప్రధాన వ్యాపార విభాగాలను, అనుబంధ సంస్థలను విక్రయించాలని భావిస్తున్నట్లు సమాచారం.