దొడ్ల డెయిరీ చేతికి శ్రీ కృష్ణ మిల్క్స్‌

లావాదేవీ విలువ రూ.50 కోట్లు

ఈనాడు, హైదరాబాద్‌: హైదరాబాద్‌ కేంద్రంగా కార్యకలాపాలు సాగిస్తున్న దొడ్ల డెయిరీ, కర్నాటకలోని శ్రీ కృష్ణ మిల్క్స్‌ ప్రైవేట్‌ లిమిటెడ్‌ను సొంతం చేసుకుంది. దీనిపై కొనుగోలు ఒప్పందాన్ని ఖరారు చేసుకున్నట్లు దొడ్ల డెయిరీ శనివారం వెల్లడించింది. రూ.50 కోట్ల విలువకు ఈ సంస్థను కొనుగోలు చేస్తున్నట్లు పేర్కొంది. వచ్చే రెండు నెలల్లో ఈ లావాదేవీ పూర్తవుతుందని తెలిపింది. శ్రీ కృష్ణ మిల్క్స్‌ 1989లో ఏర్పాటైంది. కర్నాటకలో ఇదే తొలి ప్రైవేటు డెయిరీ సంస్థ కావటం గమనార్హం. 2020-21 ఆర్థిక సంవత్సరంలో ఈ సంస్థ రూ.67 కోట్ల టర్నోవర్‌ నమోదు చేసింది. అంతకు ముందు ఆర్థిక సంవత్సరంలో రూ.76 కోట్ల టర్నోవర్‌ ఉంది.