రుచి సోయాకు.. పతంజలి ఆయుర్వేద్‌ ఆహార వ్యాపారం

దిల్లీ: బాబా రామ్‌దేవ్‌ ఆధ్వర్యంలోని పతంజలి ఆయుర్వేద్‌ తన ఆహార రిటైల్‌ వ్యాపారాన్ని గ్రూప్‌నకే చెందిన రుచి సోయా ఇండస్ట్రీస్‌కు విక్రయించనుంది. ఆహారేతర, సంప్రదాయ వైద్యం, వెల్‌నెస్‌ వ్యాపారాలపై దృష్టి పెట్టే వ్యూహంలో భాగంగా రూ.690 కోట్లకు ఈ అమ్మకాన్ని చేపట్టనుంది. పతంజలికి చెందిన ఆహార రిటైల్‌ వ్యాపారంలో కొన్ని ఆహార పదార్థాల తయారీ, ప్యాకేజింగ్‌ లేబెలింగ్, రిటైల్‌ ట్రేడింగ్‌లు ఉన్నాయి. ఈ లావాదేవీ కింద పతంజలి ఆయుర్వేద్‌కు చెందిన ఉద్యోగులు, ఆస్తులు (పతంజలి బ్రాండ్, ట్రేడ్‌మార్క్స్, డిజైన్లు, కాపీరైట్లు కాకుండా), ప్రస్తుత ఆస్తుల కాంట్రాక్టులు (రుణదాతలు, వాహనాలు, నగదు, బ్యాంకు లైసెన్సులు కాకుండా), లైసెన్సులు, అనుమతులు, పంపిణీ నెట్‌వర్క్‌ బదిలీ అవుతాయి. దీంతో కంపెనీ పేరును సైతం రుచిసోయా ఇండస్ట్రీస్‌ నుంచి ‘పతంజలి ఫుడ్స్‌ లిమిటెడ్‌’గా మార్చనుంది.