క్రెడిట్‌ కార్డు..జీవన శైలికి తగ్గట్టుగా..

వినియోగదారులు తమ అవసరాలకు తగ్గట్టుగా వినియోగించుకునే విధంగా సరికొత్త కార్డును ఏయూ స్మాల్‌ ఫైనాన్స్‌ బ్యాంక్‌ అందుబాటులోకి తెచ్చింది. లివ్‌ ఇట్‌ టుడే (లిట్‌) పేరుతో ఈ కార్డులను ప్రయాణం, వినోదం, షాపింగ్‌, ఇంధనం, హోటళ్లు తదితర వాటిల్లో తమ అవసరాలకు తగ్గట్టుగా క్రెడిట్‌ పరిమితిని పెంచుకోవడం, తగ్గించుకోవడం చేసుకోవచ్చు. సాధారణంగా బ్యాంకులు వేర్వేరు అవసరాలకు విభిన్న తరహా కార్డులను అందిస్తూ, రివార్డులు, పాయింట్లు జత చేస్తుంటాయి. దీనివల్ల కార్డుదారులు పలు క్రెడిట్‌ కార్డులను తీసుకొని వాడుకోవాల్సి వస్తుంది. దీనికి బదులుగా అన్ని రకాల ప్రయోజనాలనూ ఒకే కార్డులో మిళితం చేసి, ఈ లిట్‌ కార్డును అందిస్తున్నట్లు బ్యాంకు పేర్కొంది. అన్ని రకాల ఖర్చులపై పాయింట్లు, నగదు వెనక్కి ఇవ్వడంతోపాటు, ఎంపిక చేసిన ఓటీటీ వేదికలకు ఉచిత సభ్యత్వం, ఆన్‌లైన్‌తో పాటు, పీఓఎస్‌ లావాదేవీలకూ రివార్డులను అందిస్తున్నట్లు తెలిపింది.