Whatsapp accounts: మే నెలలో 19 లక్షల వాట్సాప్‌ ఖాతాలు బ్యాన్‌

దిల్లీ: దేశంలో మే నెలలలో 19 లక్షల ఖాతాలపై నిషేధం విధించినట్లు వాట్సాప్‌ (Whatsapp) వెల్లడించింది. గ్రీవెన్స్‌ ద్వారా వ్యక్తుల నుంచి వచ్చిన ఫిర్యాదులు, నిబంధనల ఉల్లంఘనలకు సంబంధించి సొంత మెకానిజం ఆధారంగా ఈ ఖాతాలను బ్యాన్‌ చేసినట్లు వాట్సాప్‌ తెలిపింది. ఈ మేరకు మే నెలకు సంబంధించి వివరాలను వెల్లడించింది.

నూతన ఐటీ నిబంధనల ప్రకారం 50 లక్షలకు పైబడి ఉన్న డిజిటల్‌ వేదికలు ప్రతినెలా ఫిర్యాదులు, వాటికి తీసుకున్న చర్యలకు సంబంధించి ఓ నివేదికను వెల్లడించాల్సి ఉంటుంది. ఈ నేపథ్యంలో మే 1వ తేదీ నుంచి మే 31 మధ్య కాలంలో 19 లక్షల ఖాతాలపై నిషేధం విధించినట్లు వాట్సాప్‌ అధికార ప్రతినిధి వెల్లడించారు. ఇదే రీతిలో ఏప్రిల్‌ నెలలో 16 లక్షల ఖాతాలను వాట్సాప్‌ తొలగించగా.. అంతకుముందు నెల మార్చిలో 18.05 లక్షల ఖాతాలపై వాట్సాప్‌ నిషేధం విధించింది.