Murder: దారుణం.. ప్రేమికులను చంపేసి చెట్టుకు వేలాడదీశారు!

అమ్మాయి కుటుంబ సభ్యుల ఘాతుకం

ఉన్నావ్‌(యూపీ): ఉత్తర్‌ప్రదేశ్‌లోని ఉన్నావ్‌ జిల్లాలో దారుణం చోటుచేసుకుంది. ఇద్దరు ప్రేమికులను హత్య చేసి, వారు ఆత్మహత్య చేసుకున్నట్లు నమ్మించేందుకు మృతదేహాలను చెట్టుకు వేలాడదీశారు. అమ్మాయి కుటుంబ సభ్యులు, బంధువులే ఈ ఘాతుకానికి పాల్పడ్డారు.

పోలీసులు తెలిపిన వివరాల ప్రకారం.. అగ్ర కులానికి చెందిన 17 ఏళ్ల బాలిక, దళితుడైన 19 ఏళ్ల యువకుడు ప్రేమించుకున్నారు. ఈ వ్యవహారం నచ్చని అమ్మాయి కుటుంబ సభ్యులు యువకుడిని అపహరించి ఓ మామిడి తోటలో చంపేశారు. ఆ తర్వాత బాలికనూ అక్కడకు తీసుకొచ్చి హతమార్చారు. అనంతరం వారి మృతదేహాలను చెట్టుకు వేలాడదీశారు. మంగళవారం వారి మృతదేహాలు కనిపించడంతో ఈ దారుణం వెలుగులోకి వచ్చింది. పోలీసులు బాలిక తండ్రి సహా ఏడుగురిపై కేసు నమోదు చేశారు. గురువారం నలుగురిని అరెస్టు చేసినట్లు తెలిపారు.