Medak: పండగపూట విషాదం.. కవలలు మృతి, చావుబతుకుల్లో తల్లి

ఆటోనగర్‌: మెదక్‌ పట్టణంలోని ఆటోనగర్‌లో పండగపూట విషాదం చోటుచేసుకుంది. తన ఇద్దరు పిల్లలతో కలిసి స్కూటీపై వెళ్తున్న మహిళను ప్రమాదవశాత్తు టిప్పర్‌ ఢీ కొట్టింది. ఈ ప్రమాదంలో కవలలు పృథ్వీతేజ్‌ (12), ప్రణీత్‌ తేజ్‌ (12) అక్కడికక్కడే మృతి చెందారు. ప్రమాదంలో తీవ్రంగా గాయపడిన తల్లి అన్నపూర్ణను స్థానిక ఆస్పత్రికి తరలించి చికిత్స అందిస్తున్నారు. దీపావళి పండగపూట టపాసులు కొనేందుకు చిన్నారులు తల్లితో కలిసి స్కూటీపై వెళ్తుండగా ఈ ప్రమాదం జరిగింది. అన్నపూర్ణ భర్త రెండేళ్ల క్రితం ప్రమాదంలో మృతి చెందారు. ఇవాళ కవల పిల్లలు సైతం రోడ్డు ప్రమాదంలో మృతి చెందడంతో కుటుంబసభ్యుల రోదనలు మిన్నంటాయి. ఘటనపై కేసు నమోదు చేసిన పోలీసులు దర్యాప్తు చేపట్టారు.