Crime News: వేటగాళ్ల విద్యుత్‌ తీగల ఉచ్చుకు ఇద్దరి బలి 

ములకలపల్లి: అడవి జంతువుల కోసం వేటగాళ్లు ఏర్పాటు చేసిన విద్యుత్‌ తీగల ఉచ్చుకు ఇద్దరు వ్యక్తులు బలైన ఘటన భద్రాద్రి కొత్తగూడెం జిల్లా ములకలపల్లి మండలం అటవీ ప్రాంతంలో చోటు చేసుకుంది. వివరాల్లోకి వెళ్తే.. ములకలపల్లి అటవీ ప్రాంతంలో కొంతకాలంగా యథేచ్ఛగా అటవీ జంతువుల వేట కొనసాగుతోంది. ఈ క్రమంలోనే కొందరు మాదారం ప్రాంతంలో విద్యుత్‌ తీగలు ఏర్పాటు చేశారు. కాగా, అటవీ ప్రాంతానికి సమీపంలో ఉన్న మొగరాలకుప్ప గ్రామానికి చెందిన ఐదుగురు గిరిజనులు వంటచెరుకు కోసం అడవిలోకి వెళ్లారు. ఈ క్రమంలో పాయం జాన్‌బాబు(24), పకూరం దుర్గారావు(35)లు విద్యుత్‌ తీగలకు తగలడంతో అక్కడికక్కడే మృతిచెందారు. వీరిలో పాటు వెళ్లిన మిగతా ముగ్గురు అధికారులకు సమాచారం ఇచ్చి విద్యుత్‌ తీగలను తొలగించారు. అనంతరం మృతదేహాలను అటవీ ప్రాంతం నుంచి ములకలపల్లి తరలించారు. ఘటనపై కేసు నమోదు చేసిన పోలీసులు దర్యాప్తు చేస్తున్నారు.