బిల్లు చెల్లింపు జాప్యం.. పాఠశాలకు తాళం!

పాఠశాలకు తాళం వేయడంతో బయట నిల్చొన్న విద్యార్థులు

కాగజ్‌నగర్‌, న్యూస్‌టుడే: కాగజ్‌నగర్‌ పట్టణం పెట్రోల్‌పంపు ఏరియాలోని జడ్పీ ఉన్నత పాఠశాల నూతన భవనం నిర్మాణ పనులు పూర్తి చేసి ఎనిమిది నెలలు గడిచినప్పటికీ, బిల్లు మంజూరులో జాప్యం కారణంగా.. గుత్తేదారు ఏకంగా పాఠశాలకు తాళం వేశాడు. సోమవారం ఉదయం విద్యార్థులు పాఠశాలకు రాగా.. ప్రధాన ద్వారానికి తాళం వేసి ఉంది. దీంతో విద్యార్థులు, ఉపాధ్యాయులు పాఠశాల ఎదుటే నిల్చొన్నారు. రూ.97 లక్షలు పాఠశాల బిల్లు మంజూరు కావాల్సి ఉంది. రేపు మాపు అంటూ బిల్లు మంజూరు చేయడంలో అధికారులు తీవ్ర జాప్యం చేస్తుండటంతోనే పాఠశాల గేటుకు తాళం వేసినట్లు గుత్తేదారు అబీబ్‌ తెలిపారు. బిల్లు సత్వరమే మంజూరు చేస్తామని జిల్లా విద్యాధికారి అశోక్‌ స్పష్టమైన హామీ మేరకు.. గుత్తేదారు తాళాన్ని తొలగించారు.