బాలికపై వివాహితుడి అఘాయిత్యం

వత్సవాయి, న్యూస్‌టుడే: ఎన్టీఆర్‌ జిల్లా వత్సవాయి మండలంలోని ఒక గ్రామానికి చెందిన బాలికపై ఇంటి పక్కనే నివాసం ఉండే వివాహితుడు అఘాయిత్యానికి పాల్పడిన ఘటన ఆలస్యంగా వెలుగులోకి వచ్చింది. రెండు రోజులుగా బాధితురాలు కడుపునొప్పితో బాధపడుతుండగా బుధవారం ఆమెను జగ్గయ్యపేటలోని ప్రైవేటు ఆస్పత్రికి తీసుకువెళ్లారు. పరీక్షలు చేసి ఐదో నెల గర్భిణి అని డాక్టర్‌ చెప్పారు. దీనిపై తల్లిదండ్రులు ప్రశ్నించడంతో విషయం వెలుగులోకి వచ్చింది. తల్లిదండ్రులు కూలి పనులకు వెళ్తుండగా.. బాలిక ఇంటి వద్దే ఉండేది. దీనిని ఆసరాగా తీసుకుని ఇంట్లో ఎవరూ లేని సమయంలో బాలికను ఏదో ఒక పనిపై పిలిచి మాయమాటలు చెప్పి లొంగదీసుకున్నట్లు, కొన్ని నెలలుగా పలుమార్లు ఆమెపై అఘాయిత్యానికి పాల్పడ్డాడని తేలింది. బాధితురాలి తల్లిదండ్రుల ఫిర్యాదు మేరకు గురువారం నిందితుడిని అదుపులోకి తీసుకున్న వత్సవాయి పోలీసులు అతడిపై పోక్సో కేసు నమోదు చేశారు. వైద్య పరీక్షల కోసం ఆమెను జగ్గయ్యపేట ప్రభుత్వ ఆసుపత్రికి తరలించారు. నిందితుడికి భార్య, ముగ్గురు పిల్లలు ఉన్నారు.