అనిశాకు చిక్కిన పౌరసరఫరాల అధికారి

శ్రీనివాసరావు, డీటీ

మచిలీపట్నం క్రైం, న్యూస్‌టుడే: ఓ బియ్యం వ్యాపారి నుంచి నెలవారీ మామూలు తీసుకుంటూ పౌర సరఫరాల డిప్యూటీ తహసీల్దార్‌ చెన్నూరి శ్రీనివాస్‌ అనిశా వలకు చిక్కారు. అనిశా ఏఏస్పీ స్నేహిత తెలిపిన వివరాల మేరకు జిల్లా పౌరసరఫరాల శాఖ కార్యాలయంలో డీటీగా పనిచేస్తున్న శ్రీనివాస్‌ గత కొంత కాలంగా బియ్యం వ్యాపారం చేసుకునే అవనిగడ్డకు చెందిన వినయకుమార్‌ను బెదిరించి నెలవారీ మామూలు వసూలు చేస్తున్నారు. అవనిగడ్డలోని ఆయన గోదాములు తనిఖీ చేయకుండా, ఎటువంటి కేసులు నమోదు చేయకుండా ఉండేందుకు ఇప్పటికే వివిధ రూపాల్లో కొంతమొత్తం వసూలు చేశారు. ఈనెలకు సంబంధించిన మామూలు రూ.10వేలు ఇవ్వాలని డిమాండ్‌ చేయడంతో వినయకుమార్‌ అనిశాను ఆశ్రయించారు. పథకం ప్రకారం బుధవారం మచిలీపట్నంలోని ఓ పెట్రోల్‌బంక్‌ సమీపంలో వినయకుమార్‌ నుంచి రూ.10వేలు తీసుకుంటుండగా శ్రీనివాస్‌ను రెడ్‌హ్యాండెడ్‌గా పట్టుకున్న అనిశా అధికారులు అదుపులోకి తీసుకుని కేసు నమోదు చేశారు.