ఉపాధి కల్పనకు 284 యూనిట్లు

అనంతపురం (శ్రీనివాస్‌నగర్‌): ప్రధాన మంత్రి ఉపాధి కల్పన పథకం (పీఎంఈజీపీ) కింద 2022-23 ఆర్థిక సంవత్సరంలో 284 యూనిట్ల ద్వారా రుణ సదుపాయం కల్పిస్తామని ఏపీ ఖాదీ, గ్రామీణ పరిశ్రమల మండలి సహాయ సంచాలకుడు ఐజయ్య తెలిపారు. ఈ యూనిట్లలో భాగంగా మార్జిన్‌ రూపంలో రూ.8.24 కోట్లు నిధులు వచ్చాయన్నారు. ఇప్పటికే 96 యూనిట్లు స్థాపించామన్నారు. ఉత్పత్తి, సేవా రంగాల్లో పరిశ్రమలు నెలకొల్పడానికి ఆసక్తి కలిగిన నిరుద్యోగ యువత ఈ అవకాశాన్ని సద్వినియోగించుకోవాలని సూచించారు. నిర్దేశిత ధ్రువీకరణ పత్రాలతో ఈనెల 15వ తేదీలోపు దరఖాస్తులు చేసుకోవాలని పేర్కొన్నారు. ఈనెల 21న జరిగే రుణమేళాలో రుణాలు మంజూరీ చేయిస్తామన్నారు.