న్యూస్‌టుడే విలేకరి రమేష్‌పై దాడి హేయం

అనంతపురం(కళ్యాణదుర్గంరోడ్డు), న్యూస్‌టుడే : ముఖ్యమంత్రి జగన్‌ పర్యటన నేపథ్యంలో కళ్యాణదుర్గం బహిరంగసభలో న్యూస్‌టుడే విలేకరి రమేష్‌పై వైకాపా గూండాలు దాడి చేయడం అత్యంత బాధాకరమని అనంతపురం జిల్లా తెదేపా అధ్యక్షుడు వెంకటశివుడు యాదవ్‌, మాజీ మంత్రులు కాలవ శ్రీనివాసులు, పల్లె రఘునాథరెడ్డి, పరిటాల సునీత, తెదేపా రాష్ట్ర మీడియా సమన్వయకర్త బీవీ వెంకట్రాముడు ఆందోళన వ్యక్తం చేశారు. వైకాపా పాలనలో మీడియాపై దాడులు నిత్యకృత్యమయ్యాయని, అధికారం పోతుందనే అక్కసుతో వైకాపా అల్లరి మూకలు దాడులకు తెగబడటం దారుణమన్నారు. గతంలోనూ ఉరవకొండ, బొమ్మనహాళ్‌ విలేకరులపై దాడులకు పాల్పడ్డారని, మీడియా దాడులను నియంత్రించడంలో పోలీసులు ఘోరంగా విఫలమవుతున్నారని, ఎన్నికల కోడ్‌ అమలులో ఉన్నా కూడా రౌడీమూకలు రెచ్చిపోవడం ప్రజలు గమనించాలన్నారు. దాడి చేసిన వారిని తక్షణమే అరెస్టు చేసి, చర్యలు తీసుకోవాలని వారు డిమాండ్‌ చేశారు. ఎన్డీఏ ప్రభుత్వం రాగానే జర్నలిస్టులపై దాడి చేసిన వారిని ఎవరినీ వదిలిపెట్టమని హెచ్చరించారు.