విద్యార్థిని మిస్బా మృతి కేసులో అధికారుల అలసత్వం

మైనారిటీ హక్కుల పరిరక్షణ సమితి రాష్ట్ర అధ్యక్షుడి ఆరోపణ

పలమనేరు, న్యూస్‌టుడే: పట్టణంలోని ప్రైవేటు పాఠశాల విద్యార్థి మిస్బా ఆత్మహత్య కేసులో అధికారులు అలసత్వం ప్రదర్శించారని మైనారిటీ హక్కుల పరిరక్షణ సమితి రాష్ట్ర అధ్యక్షుడు ఫరూక్‌ షుబ్‌లి ఆరోపించారు. ఆ మేరకు ఆయన విద్యాశాఖ ప్రత్యేక ప్రధాన కార్యదర్శి ప్రవీణ్‌ ప్రకాష్‌కు ఫిర్యాదు పంపారు. ఆ కాపీని ఇక్కడ విడుదల చేశారు. 2022 మార్చి నెలలో మిస్బా అనే 10వ తరగతి విద్యార్థి పాఠశాలలో ఒత్తిడి కారణంగా ఆత్మహత్య చేసుకున్న సంగతి విదితమే. అప్పట్లో ఈ సంఘటనపై ఆందోళనలు, నిరసనలు వెల్లువెత్తాయి. పాఠశాలను తన కుటుంబ సభ్యుల పేరుతో నడుపుతున్న ప్రభుత్వ ఉపాధ్యాయుడు రమేష్‌పై జిల్లా అధికారులు ఉదాసీనంగా వ్యవహరించారని ఆరోపించారు. పాఠశాలలో అతని ప్రమేయం ఎక్కువగా ఉన్నట్లు అప్పట్లో చేపట్టిన విచారణలో వెల్లడైందన్నారు. ఈ సంఘటన అనంతరం కొంతకాలం సస్పెండ్‌ అయిన ఉపాధ్యాయుడికి గంగవరం ప్రధాన పాఠశాలలో మళ్లీ పోస్టింగ్‌ ఇవ్వడంపై తీవ్ర అభ్యంతరం తెలిపారు. ఈ విషయంలో విద్యాశాఖలో ఉపాధ్యాయుడికి అధికారులు అండగా నిలబడ్డారని పేర్కొన్నారు. అత పెద్ద సంఘటనకు కారకుడైన ఉపాధ్యాయుడిని మళ్లీ అక్కడే పోస్టింగ్‌ ఇవ్వడం వెనుక ఆంతర్యం ఏమని ప్రశ్నించారు. దీనిపై సమగ్రంగా విచారణ చేపట్టాలని ఆయన విజ్ఞప్తి చేశారు.