సుస్థిర అభివృద్ధి లక్ష్యాల సాధనకు చర్యలు

సమీక్ష చేస్తున్న కలెక్టర్‌ శివశంకర్‌, హాజరైన వివిధ శాఖల అధికారులు

నరసరావుపేట అర్బన్‌, న్యూస్‌టుడే : జిల్లాలో ప్రభుత్వ సంక్షేమ పథకాల అమలు ద్వారా సుస్థిర అభివృద్ధి లక్ష్యాల సాధనకు చర్యలు తీసుకోవాలని కలెక్టర్‌ శివశంకర్‌ లోతేటి ఆదేశించారు. కలెక్టరేట్‌లో సోమవారం సమీక్ష సమావేశం నిర్వహించారు. కలెక్టర్‌ మాట్లాడుతూ జిల్లాలో చేపట్టిన గ్రామోదయం కార్యక్రమంలో ప్రత్యేకాధికారులు మండలాల్లో పర్యటిస్తే మరిన్ని సమస్యల పరిష్కారానికి అవకాశం ఉందన్నారు. అభివృద్ధి పనుల్లో వెనుకబడిన 10 మండలాల్లో తీసుకోవాల్సిన చర్యలను కలెక్టర్‌ వివరించారు. ఆయుష్మాన్‌భారత్‌, ఈకేవైసీ, పంచాయతీల్లో చెత్త నుంచి సంపద, జిల్లాలో బాలికలకు పౌష్టికాహారం అందజేత, రక్తహీనత సమస్యలు తదితర అంశాలపై సూచనలు చేశారు. హెచ్‌3ఎన్‌2 వైరస్‌ వ్యాప్తి చెందుతున్న నేపథ్యంలో తీసుకోవాల్సిన జాగ్రత్తలపై ప్రజల్లో అవగాహన కల్పించాలని చెప్పారు. ముఖ్యమంత్రి ప్రారంభించనున్న రాగిజావ పంపణీని విజయవంతం చేయాలని తెలిపారు. కలెక్టరేట్‌లో తెలుగువారి తొలి పండగ ఉగాది వేడుకలు నిర్వహిస్తున్నట్లు వెల్లడించారు. సమావేశంలో డీఆర్వో వినాయకం, జిల్లా అధికారులు, ప్రత్యేకాధికారులు పాల్గొన్నారు.