Double BedRooms: అమ్మకానికి.. రెండు పడక గదుల ఇళ్లు!

లబ్ధిదారుల చేతులు మారుతోన్న సంక్షేమ గృహాలు

ఈనాడు, హైదరాబాద్‌; న్యూస్‌టుడే, జియాగూడ, ఖైరతాబాద్‌

జియాగూడలోని రెండు పడక గదుల ఇళ్లు

‘‘పేదలకు ప్రభుత్వం ఉచితంగా ఇస్తున్న రెండు పడక గదుల ఇళ్లను విక్రయించడం, కొనడం.. రెండూ నేరమే. అమ్ముతున్నవారిపైనా, కొనేవారిపైనా కఠిన చర్యలు తీసుకుంటాం.’’

ఇళ్ల పట్టాల పంపిణీ రోజే ప్రజాప్రతినిధులు ఈ విషయాన్ని లబ్ధిదారులకు స్పష్టంగా చెబుతున్నారు. అయినా కేటాయించిన నెల రోజులకే నగరంలోని పలు చోట్ల డబుల్‌ ఇళ్లు పక్కదారి పడుతున్నాయి. లబ్ధిదారులు వేర్వేరు కారణాలతో విక్రయిస్తున్నారు.

ఎలా అమ్ముతున్నారంటే

* నగరంలో జీహెచ్‌ఎంసీ ఆధ్వర్యంలో లక్ష రెండు పడక గదుల ఇళ్ల నిర్మాణం 2016లో మొదలైంది. ఇప్పటి వరకు 5 వేల ఇళ్లను ప్రభుత్వం లబ్ధిదారులకు అందించింది.

* రెండు పడక గదుల ఇంటి పట్టాలో ఇతరుల పేరు చేర్చడం కుదరదు. అందువల్ల.. కొనుగోలుదారులు రూ.100 స్టాంపు పేపరుపై విక్రయపత్రాన్ని రాసుకుని.. పట్టాదారులు, వారసుల సంతకాలు తీసుకుంటున్నారు.

* లబ్ధిదారుల సంక్షేమ సంఘాల్లోని కొందరు వ్యక్తులు, స్థానిక ప్రజాప్రతినిధులు ఏజెంట్లుగా వ్యవహరిస్తూ అమ్మకాలను, కొనుగోళ్లను ప్రోత్సహిస్తున్నారు.

ఎక్కడెక్కడ కొనుగోళ్లు

జియాగూడ, ఖైరతాబాద్‌, బాలానగర్‌ చౌరస్తాలోని చిత్తారమ్మబస్తీ, నెక్లెస్‌రోడ్డులోని అంబేడ్కర్‌నగర్‌, వనస్థలిపురం తదితర ప్రాంతాల్లో.

జియాగూడలో.. ఇక్కడి మురికివాడలో జి+5 పద్ధతిలో 840 ఇళ్లను నిర్మించారు. 568 ఫ్లాట్లను లబ్ధిదారులకు కేటాయించారు. 15 ఇళ్లు అమ్ముకున్నారు.

ఖైరతాబాద్‌లోని ఐమాక్స్‌కు ఎదురుగా.. ఇక్కడ 210 ఇళ్లను నిర్మించారు. ఇక్కడ రూ.17-20 లక్షల మధ్య విక్రయిస్తున్నారు. 10 ఇళ్లు అమ్మారు.

అమ్మేందుకు కారణాలు

* ఆర్థిక ఇబ్బందులు, పిల్లల పెళ్లిళ్లు, వ్యాపారాలు, ఇతరత్రా అవసరాలకు కొందరు లబ్ధిదారులు ఇళ్లను అమ్ముతున్నారు.

* వేరే ప్రాంతంలో అప్పటికే ఇల్లు ఉండటం.

* ఇరుగు పొరుగుతో సర్దుకుపోలేక.

* వాతావరణం నచ్చక.

* నిర్వహణ సమస్యలు, ఇతరత్రా కారణాలతో