బ్యాంకులో భారీదోపిడీ

ఐదు కిలోల బంగారం దొంగలపాలు

బెంగళూరు (గ్రామీణం), న్యూస్‌టుడే : దొడ్డబళ్లాపుర సమీపంలోని హొసహళ్లి కర్ణాటక గ్రామీణ బ్యాంకులో శుక్రవారం అర్ధరాత్రి చోరీ జరిగింది. దొంగతనం జరిగిన విషయాన్ని ఆదివారం ఉదయం గుర్తించారు. ముసుగులు ధరించి వచ్చిన నలుగురు ఆగంతకులు ఐదు కిలోల ఆభరణాలు, రూ.14 లక్షల నగదుతో పరారయ్యారు. బ్యాంకుకు శని, ఆదివారం సెలవు. షట్టరు తాళం తీసి ఉండడాన్ని గుర్తించిన స్థానికులు ఇచ్చిన ఫిర్యాదుతో బ్యాంకు ప్రతినిధులు అక్కడకు వచ్చి దొంగతనం జరిగిందని గుర్తించి పోలీసులకు ఫిర్యాదు చేశారు. చోరీ సొత్తు విలువను రూ.3.5 కోట్లుగా అంచనా వేశారు. బెంగళూరు గ్రామీణ ఎస్పీ మల్లికార్జున బాలదండి, ఇతర పోలీసు అధికారులు బ్యాంకులోని సీసీ కెమెరా ఫుటేజ్‌ను పరిశీలించారు. సెలవు రోజుల్లో లాకర్‌ తెరిస్తే సైరన్‌ మోగే సదుపాయం బ్యాంకులో ఉంది. కానీ, సైరన్‌ మోగకపోవడం పలు అనుమానాలకు తావిస్తోందని మల్లికార్జున తెలిపారు.