Brahmanandam: భాజపాకు మద్దతుగా నటుడు బ్రహ్మానందం ప్రచారం

మైసూరు, న్యూస్‌టుడే : కర్ణాటక విధానసభ ఎన్నికలు చేరువ అవుతుండడంతో సినీనటుల ప్రచారమూ ఊపందుకుంది. చిక్కబళ్లాపుర నియోజకవర్గంలోని పుర, గిడగానహళ్లి, మంచెనహళ్లి, పోశెట్టిహళ్లి, కనగానగొప్ప, జోడి బొమ్మనహళ్లి తదితర గ్రామాలో ప్రముఖ హాస్య నటుడు బ్రహ్మానందం గురువారం ప్రచారాన్ని నిర్వహించారు. భాజపా అభ్యర్థి, మంత్రి డాక్టర్‌ కె.సుధాకర్‌కు ఓటు వేసి గెలిపించాలని తెలుగులో విన్నవించారు. ఆంధ్రప్రదేశ్‌కు సరిహద్దు జిల్లా కావడంతో చిక్కబళ్లాపురలో ఎక్కువ మంది తెలుగు వారే ఉన్నారు. సేద్యం, ఉపాధి రంగాల్లో స్థిరపడిన తెలుగు ప్రజలను ఆకట్టుకునేందుకు బ్రహ్మానందాన్ని రంగంలో దించారు. మంత్రి సుధాకర్‌తో తనకు మొదటి నుంచి పరిచయం ఉండడం, వైద్యునిగా, మంత్రిగా ఆయన చేసిన సేవలు తెలిసి ప్రచారానికి వచ్చానని బ్రహ్మానందం చెప్పారు. చిక్కబళ్లాపురలో నటుడు దర్శన్‌, లోక్‌సభ సభ్యుడు పీసీ మోహన్‌లతో కలిసి సుధాకర్‌ రోడ్‌షోలో పాల్గొన్నారు.