వినియోగదారుల కేసులు లోక్‌ అదాలత్‌లో పరిష్కారం

వినియోగదారుల కమిషన్‌ సభ్యులకు సూచనలు ఇస్తున్న జిల్లా జడ్జి శ్రీనివాసరావు

ఖమ్మం న్యాయవిభాగం, న్యూస్‌టుడే: ఫిబ్రవరి 11న జరగనున్న జాతీయ లోక్‌ అదాలత్‌లో వినియోగదారుల కోర్టుకు సంబంధించిన కేసులను కూడా పరిష్కరిస్తామని జిల్లా ప్రధాన న్యాయమూర్తి డా.టి.శ్రీనివాసరావు అన్నారు. న్యాయమూర్తి తన ఛాంబర్‌లో వినియోగదారుల కమిషన్‌ సభ్యులతో శుక్రవారం సమావేశమై పలు అంశాలపై చర్చించారు. కమిషన్‌ తీర్పుల వల్ల కొన్ని సందర్భాల్లో కక్షిదారులు అప్పీల్‌కు వెళ్లే అవకాశం ఉందని, అదే లోక్‌ అదాలత్‌లో సమస్య పరిష్కారమైతే అంతిమ తీర్పుగా ఉంటుందన్నారు. వీలైనన్ని కేసులను పరిష్కరించేందుకు కృషి చేయాలని సభ్యులకు సూచించారు. న్యాయసేవాసంస్థ న్యాయమూర్తి ఎంఏ.జావీద్‌పాషా, వినియోగదారుల కమిషన్‌ అధ్యక్షురాలు వడ్లమన్నాటి లలిత, సభ్యురాలు అద్దెపల్లి మాధవీలత తదితరులు పాల్గొన్నారు.