ఇంటర్‌ విద్యార్థిని ఆత్మహత్య

పెనమలూరు, న్యూస్‌టుడే: గణిత పరీక్షలో మార్కులు తక్కువ వస్తాయనే మానసికాందోళనతో ఇంటర్‌ విద్యార్థిని ఆత్మహత్యకు పాల్పడిన ఘటన తాడిగడప మున్సిపాలిటీలో చోటుచేసుకొంది. పోలీసుల కథనం ప్రకారం.. మున్సిపాలిటీలో నివాసముంటున్న ఆయన పెద్ద కుమార్తె(17) ఇంటర్‌ మొదటి ఏడాది చదువుతోంది. గణిత పరీక్షలో మార్కులు తక్కువ వస్తాయనే ఆందోళనతో మంగళవారం ఉదయం నుంచి మానసిక ఒత్తిడికి గురవుతుండటాన్ని తల్లిదండ్రులు గుర్తించి ధైర్యం చెప్పారు. మంగళవారం సాయంత్రం తల్లిదండ్రులు బయటకు వెళ్లగా సోదరీసోదరులు ఆడుకోవడానికి బయటకు వెళ్లారు. రాత్రి తల్లి పని నుంచి ఇంటికి చేరుకొని తలుపులు తట్టినా తెరవకపోవడంతో కిటికీలోంచి చూడగా విద్యార్థిని చున్నీతో పైఫ్యానుకు ఉరిపెట్టుకొని వేలాడుతూ కనిపించింది. వెంటనే స్థానికుల సాయంతో తలుపులు పగులకొట్టి కిందకు దించి చూడగా అప్పటికే విద్యార్థిని ప్రాణాలు కోల్పోయినట్లు గుర్తించారు. తండ్రి బుధవారం పోలీసులకు ఫిర్యాదు చేయగా అనుమానాస్పద మృతిగా కేసు నమోదు చేసి మృతదేహాన్ని పోస్ట్‌మార్టం చేయడానికి తరలించారు.