ప్రజా సమస్యలపై నిలదీసిన కౌన్సిలర్లు

ఆదోని మార్కెట్ : ప్రజా సమస్యలపై అధికార పార్టీ కౌన్సిలర్లే అధికారులను ప్రశ్నించారు. బుధవారం ఛైర్‌ పర్సన్‌ శాంత అధ్యక్షతన జరిగిన పురపాలక సమావేశంలో సభ్యులు మాట్లాడారు. ఒకటో వార్డులో రహదారులు, మురుగు కాలువలు నిర్మించాలని ఎన్నిసార్లు విన్నవించినా పట్టించుకోవడం లేదని సభ్యురాలు పార్వతి అన్నారు. వెంకటేశ్వరకాలనీలో బోరు మరమ్మతుకు గురైందని, 25వ వార్డులో సామూహిక శౌచాలయాల బిల్లులు రాలేదని, 5వ వార్డులో అసంపూర్తిగా వదిలేసిన సీసీ రహదారి నిర్మాణం పూర్తి చేయాలని సభ్యులు కోరారు. సమస్యలను అధికారులు పట్టించుకోవడం లేదని విమర్శించారు. మొక్కుబడి సమావేశాలు కాకుండా.. సమస్యల పరిష్కారానికి చొరవ చూపాలని కోరారు. అనంతరం పలువురు సభ్యులు తమ వార్డు సమస్యలపై వినతులు సమర్పించారు. సమావేశంలో వైస్‌ ఛైర్మన్లు మహమ్మద్‌ గౌస్‌, నర్సింహులు, కమిషనర్‌ కృష్ణ, సహాయ కమిషనర్‌ అనుపమ, వివిధ విభాగాల అధికారులు, సిబ్బంది పాల్గొన్నారు.