జగదభిరామ.. జానకిరామ

వేడుకగా సీతారాముల కల్యాణం

కల్యాణమూర్తిగా స్వామివారు.. తిలకిస్తున్న భక్తులు

నెల్లూరు(సాంస్కృతికం): జిల్లా వ్యాప్తంగా శ్రీరామనవమి వేడుకలను ప్రజలు భక్తిశ్రద్ధలతో జరుపుకొన్నారు. నెల్లూరు దర్గామిట్టలోని శబరి శ్రీరామక్షేత్రం ఆధ్వర్యంలో బుధవారం శ్రీరామ స్థూపం ప్రాంగణంలో వేలాది మంది సమక్షంలో సీతారాముల కల్యాణోత్సవం నిర్వహించారు. ముత్యాల తలంబ్రాల కార్యక్రమాన్ని కనులపండువగా జరిపించారు. 1వ అదనపు కోర్టు న్యాయమూర్తి కపర్థి, గాయత్రి దంపతులు, తెలుగుగంగ విశ్రాంత ఎస్‌ఈ హరినారాయణరెడ్డి పట్టు వస్త్రాలను, ముత్యాల తలంబ్రాలను దేవస్థానం నుంచి ఊరేగింపుగా తీసుకొచ్చి స్వామివారికి సమర్పించారు. తితిదే కల్యాణ మండపంలో భక్తులకు భోజనాలు పెట్టారు. మందిర ఛైర్మన్‌ చెన్నూరు వెంకటేశ్వరరెడ్డి పర్యవేక్షణలో జరిగిన కల్యాణోత్సవంలో అధిక సంఖ్యలో భక్తులు పాల్గొన్నారు.

పట్టు వస్త్రాలు, ముత్యాల తలంబ్రాలు తీసుకొస్తున్న న్యాయమూర్తి, అధికారులు