రాయగడ మీదుగా వందేభారత్‌?

దుర్గు - విశాఖ మధ్య నడిపే అవకాశాలు

వందే భారత్‌ రైలు

రాయగడ పట్టణం, న్యూస్‌టుడే: రాయగడ మీదుగా ప్రతిష్ఠాత్మక వందే భారత్‌ ఎక్స్‌ప్రెస్‌ నడవనుందా అంటే అవునన్న సంకేతాలు వినిపిస్తున్నాయి. ఒడిశా మీదుగా ఛత్తీస్‌గఢ్‌ - ఏపీ (దుర్గు - విశాఖ) రాష్ట్రాల మధ్య దీనిని నడిపేందుకు రైల్వే అధికారులు ప్రతిపాదించినట్లు వార్తలొస్తున్నాయి. ఎన్నికల అనంతరం దీనికి శ్రీకారం చుట్టనున్నట్లు ఊహాగానాలు వినిపిస్తున్నాయి. ఇదేగనక జరిగితే ఈ మూడు రాష్ట్రల ప్రజలతోపాటు ఏపీ రాష్ట్రంతో అనుబంధమున్న ఒడిశా, ఛత్తీస్‌గఢ్‌ తెలుగు వాళ్లకు ఎంతగానో ఉపయోగపడనుందన్న అభిప్రాయాలు వ్యక్తమవుతున్నాయి. 565 కి.మీ. పొడవున్న దుర్గు - విశాఖ మధ్య కేవలం 8 గంటల 30 నిమిషాలలో ప్రయాణించే వీలుంటుందన్న అంచనాలు వినిపిస్తున్నాయి. దుర్గులో ఉదయం 6 గంటలకు బయలుదేరి అదేరోజు మధ్యాహ్నం 2.30 గంటలకు విశాఖపట్నం చేరుకోనున్నట్లు అంచనా వేస్తున్నారు. విశాఖలో మధ్యాహ్నం 3.15కి తిరిగి బయలుదేరి రాత్రి 11.50కు దుర్గు చేరుకుంటుందని చెబుతున్నారు. వందేభారత్‌తో దుర్గు-విశాఖ మధ్య స్టాపేజీలను 11కి కుదించే వీలుంటుందన్న అభిప్రాయాలు వ్యక్తమవుతున్నాయి. దీనికి సంబంధించి వివరాలు సామాజిక మాధ్యమంలో వైరల్‌ అవుతుండడం గమనార్హం.

ఈ స్టేషన్లలో నిలుపుదల

దుర్గు - విశాఖ మధ్య నడవనున్న ఈ రైలు రాయిపూర్‌, లఖోవి, మహాసముంద్‌, ఖారియర్‌ రోడ్‌, కంటాబంజి, టిట్లాగఢ్‌, కెసింగ, సింగ్‌పూర్‌ రోడ్‌, రాయగడ, పార్వతీపురం, విజయనగరం స్టేషన్లలో నిలిపే అవకాశమున్నట్లు అంచనా వేస్తున్నారు. రాయగడను రైల్వే డివిజన్‌  ప్రకటించి, దీనికి సంబంధించి పనులు కొనసాగుతున్న నేపథ్యంలో వందేభారత్‌ రాకతో ఈ మార్గంలో ప్రయాణికులకు మంచి ప్రయోజనముంటుందన్న అభిప్రాయాలు వ్యక్తమవుతున్నాయి. ఈ విషయమై వాల్తేరు డివిజన్‌ ఓ రైల్వే ఉన్నతాధికారిని ‘న్యూస్‌టుడే’ సంప్రదించగా దీనికి సంబంధించి అధికారికంగా ఎలాంటి సమాచారం రాలేదన్నారు. డివిజన్‌ పరిధిలో ఈ రైలు ప్రయాణానికి సంబంధించి లైన్‌ క్లియరెన్స్‌ సమాచారం ముందుగా ఇవ్వాల్సి ఉంటుందని, అలాంటిదేమి తమకు ఇంతవరకు చేరలేదని ఆయన వెల్లడించారు.