15 మండలాలు.. 893 ఎకరాలు

 తుపాను నష్టంపై అంచనా

ఒంగోలు నగరం, న్యూస్‌టుడే: గతవారం తుపాను ప్రభావంతో దెబ్బతిన్న పంటలపై రైతువారీ నష్టం అంచనా వేసి నివేదిక సమర్పించాలని ప్రభుత్వం ఆదేశించింది. ఈ మేరకు జేడీఏ ఎస్‌.శ్రీనివాసరావు వ్యవసాయ అధికారులకు మార్గదర్శకాలు జారీ చేశారు. తుపాను మరుసటి రోజు పొలాల్లో నీరు నిలిచి ఉండటంతో ఎక్కువ విస్తీర్ణంలో నష్టం చూపించారు. ప్రాథమిక అంచనా 2500 ఎకరాలు కాగా ఇప్పుడు అది 893 ఎకరాలకు పరిమితమైంది. శింగరాయకొండ, పొన్నలూరు, జరుగుమల్లి, సీఎస్‌పురం, పీసీ పల్లి, పామూరు, కనిగిరి, నాగులుప్పలపాడు, సంతనూతలపాడు, చీమకుర్తి, కొండపి తదితర మండలాల్లో పంట నష్టాలు జరిగాయి. 33 శాతం పైగా దెబ్బతిన్న పంటలను రెవెన్యూ, వ్యవసాయశాఖ ఉమ్మడిగా అంచనా వేస్తోంది. జేడీఏ మాట్లాడుతూ 15 మండలాల్లో 11 రకాల పంటలు దెబ్బతిన్నట్లు పేర్కొన్నారు. ప్రభుత్వానికి నివేదిక పంపాక ఇన్‌పుట్‌ రాయితీ విడుదల చేస్తారన్నారు.