మీరు ఎవరు? ఆ సీటులో ఎందుకు కూర్చున్నారు?

మార్కాపురం ఎంపీపీ భర్తపై ఉప కలెక్టర్‌ ఆగ్రహం

మార్కాపురం, న్యూస్‌టుడే: మార్కాపురం మండల పరిషత్తు అభివృద్ధి కార్యాలయాన్ని గురువారం సాయంత్రం ఉప కలెక్టర్‌ సేథు మాధవన్‌ ఆకస్మిక తనిఖీ చేశారు. ఈ సందర్భంగా పక్కనే ఉన్న ఎంపీపీ కార్యాలయంలో ఉన్న వ్యక్తులను బయటకు పిలిపించారు. ‘‘మీరు ఎవరు? ఆ సీటులో ఎందుకు కూర్చున్నారు? ఇక్కడ ఎంపీపీ మహిళ కదా? అధికారుల అనుమతి లేకుండా మీతో పాటు ఇతరులు ఎందుకు ఉన్నారు?’’ అంటూ ఎంపీపీ భర్త, వైకాపా నాయకుడు పోరెడ్డి చెంచిరెడ్డిపై ఆగ్రహం వ్యక్తం చేశారు. నిబంధనలకు విరుద్ధంగా వ్యవహరించడం సరికాదని, ప్రోటోకాల్‌ ఉల్లంఘన కిందకు వస్తుందన్నారు. కార్యాలయంలో ప్రభుత్వానికి సంబంధించిన దస్త్రాలు మాయమైతే ఎవరిది బాధ్యత అన్నారు. ఎంపీపీ లేని సమయంలో ఆమె కార్యాలయాన్ని తెరిచి అక్కడ కూర్చోవడం చట్ట వ్యతిరేకమన్నారు. ఇక్కడి పరిస్థితులపై తక్షణమే తనకు నివేదిక ఇవ్వాలని ఎంపీడీవో నరసింహులు, కార్యాలయంలోని అధికారులను ఉప కలెక్టర్‌ ఆదేశించారు.