ఆలయం పునర్నిర్మించాలంటూ దీక్ష

నిరాహార దీక్ష చేస్తున్న రాజాశ్రీకాంత్‌, చిత్రంలో మద్దతుదారులు

పలాస, న్యూస్‌టుడే: పలాసలో వీరవెంకట సత్యనారాయణ దేవాలయం పునర్నిర్మించేలా అధికారులు, ప్రభుత్వం చర్యలు తీసుకోవాలని కాశీబుగ్గ వైశ్య సంక్షేమ సంఘం అధ్యక్షుడు రాజాశ్రీకాంత్‌ డిమాండ్‌ చేశారు. కాశీబుగ్గ మహాత్మాగాంధీ విగ్రహం వద్ద శనివారం నిరవధిక నిరాహార దీక్ష చేపట్టారు. ఆలయం పడగొట్టి పెట్రోల్‌బంకు నిర్వహిస్తున్నారని, పక్కనే పాఠశాల, కళాశాలలు ఉన్నాయని అధికారులకు ఫిర్యాదు చేసినా పట్టించుకోకపోవటంతో దీక్ష ప్రారంభించానని వివరించారు. మద్దతు ఇచ్చేవారంతా తనకు అండగా నిలబడి సంతకాలు చేయాలంటూ కోరారు. కె.జనార్దన, ప్రభుత్వ జూనియర్‌ కళాశాల విద్యార్థులు పాల్గొన్నారు.

ఆర్థిక స్థితి బాగోలేక అమ్మేశాం: పలాసలో తాత ముత్తాతల నుంచి వచ్చిన ఆస్తిని ఆర్థిక పరిస్థితి బాగాలేకపోవటంతోనే అమ్మేశామని పలాసకు చెందిన తాళాసు రామారావు తెలిపారు. వ్యక్తిగత కక్షతో అదే స్థలంపై దేవాలయం అంటూ ప్రచారం చేస్తున్నారని, తాతముత్తాతల నుంచి సంక్రమించిన స్థలంపై రాద్ధాంతం చేయవద్దని ఆయన కోరారు.