రూ.29.5 లక్షల నగదు స్వాధీనం

ఆర్టీసీ బస్సులో తరలిస్తుండగా పట్టుకున్న అధికారులు

అరసవల్లి, న్యూస్‌టుడే: సార్వత్రిక ఎన్నికల ప్రక్రియలో భాగంగా నిర్వహిస్తున్న తనిఖీల్లో సోమవారం భారీ మొత్తంలో నగదు పట్టుబడింది. విశాఖపట్నం నుంచి మెళియాపుట్టికి ఆర్టీసీ బస్సులో తరలిస్తున్న రూ.29.5 లక్షల నగదును శ్రీకాకుళం నగరంలోని సింహద్వారం వద్ద ఎన్నికల నిఘా అధికారులు స్వాధీనం చేసుకున్నారు. తహసీల్దారు సీహెచ్‌ రాధాకృష్ణ ఆర్టీసీ బస్సులో సోదాలు నిర్వహిస్తుండగా.. విశాఖపట్నానికి చెందిన కదిలిండి వెంకటేశ్వరరాజు పండ్ల సంచిని పరిశీలించగా నగదు బయట పడింది. తాను మెళియాపుట్టిలో ఏకలవ్య పాఠశాల పనులు చేపడుతున్న గుత్తేదారుడినని ఆ పనులకు డబ్బులు అవసరం కాగా ఈనెల 24వ తేదీన విశాఖ ఇండియన్‌ బ్యాంక్‌లో నగదు ఉప సంహరించినట్లు సదరు గుత్తేదారు తనిఖీ అధికారులకు తెలియజేశారు. అధికారులు మళ్లీ ప్రశ్నించగా కూలీలకు డబ్బులు చెల్లించేందుకని చెప్పారు. పొంతనలేని సమాధానాలు చెప్పడంతో సహాయ కలెక్టర్‌ రాఘవేంద్ర మీనాకు సమాచారం అందించారు. ఈ మేరకు కేసు నమోదు చేసి నగదు స్వాధీనం చేసుకున్నట్లు తహసీల్దారు పేర్కొన్నారు.