సైనికుల త్యాగాలను స్మరించుకోవాలి

గేయ రచయిత భువనచంద్ర

పొట్టి శ్రీరాములు విగ్రహానికి నివాళులర్పిస్తున్న దృశ్యం

ప్యారిస్‌, న్యూస్‌టుడే: అమరజీవి పొట్టి శ్రీరాములు స్మారక భవన నిర్వాహక కమిటీ తరఫున గణతంత్ర దిన వేడుకలు అమరజీవి స్మారక భవన ప్రాంగణంలో గురువారం జరిగాయి. ముందుగా పొట్టి శ్రీరాములు  విగ్రహానికి ఛైర్మన్‌ అనిల్‌కుమార్‌ రెడ్డి ఆధ్వర్యంలో కమిటీ సభ్యులు పూలమాల వేసి నివాళులర్పించారు. తర్వాత భవన ప్రాంగణంలో ప్రముఖ గేయ రచయిత, కమిటీ సభ్యులు భువనచంద్ర జెండా ఆవిష్కరించారు. అనంతరం ఆయన మాట్లాడుతూ....ఈ ఏడాది జరిగే వేడుకలకు ఓ ప్రత్యేకత ఉందని, సొంత సాంకేతిక పరిజ్ఞానంతో మనదేశ రక్షణ శాఖ తయారుచేసిన ఆయుధాలను దిల్లీలో జరుగుతున్న గణతంత్ర దిన వేడుకల్లో ప్రదర్శించారని కొనియాడారు. దేశ రక్షణలో భాగంగా ప్రాణత్యాగం చేసిన త్రివిధ దళాల సైనికులను పౌరులందరూ స్మరించుకోవాలన్నారు. కమిటీ కార్యదర్శి, కోశాధికారి కృష్ణారావు, సంయుక్త కార్యదర్శి ఊరా శశికళ, కమిటీ సభ్యులు డాక్టర్‌ విస్తాలి శంకరరావు, డాక్టర్‌ ఎం.వి.నారాయణ గుప్తా, జేఎం నాయుడు తదితరులు పాల్గొన్నారు.