ఓపీఎస్‌ ఓటు కూడా అన్నాడీఎంకేకే

జయకుమార్‌

సైదాపేట, న్యూస్‌టుడే: రామనాథపురంలో ఓపీఎస్‌కు ప్రజాదరణ లేదని, అతని ఓటు కూడా తమ పార్టీకేనని అన్నాడీఎంకే మాజీ మంత్రి జయకుమార్‌ తెలిపారు. పార్టీ ఉత్తర చెన్నై అభ్యర్థి రాయపురం మనోకు మద్దతుగా మంగళవారం ఎన్నికల ప్రచారం చేశారు. ఆయన మాట్లాడుతూ... జాతీయ పార్టీలు పాలించే రాష్ట్రాల్లో అభివృద్ధి లేదని తెలిపారు. ఎన్నికల తర్వాత ఈపీఎస్‌ నేతృత్వంలోని అన్నాడీఎంకే లేకుండా పోతుందని భాజపా రాష్ట్ర అధ్యక్షుడు అన్నామలై చేసిన వ్యాఖ్యలపై స్పందించారు. భాజపా అధ్యక్షుడిగా ఓపీఎస్‌, ప్రధాన కార్యదర్శి టీటీవీ దినకరన్‌ ఉంటారని, అన్నామలై కనపించకుండా పోతారని ఎద్దేవా చేశారు. 2026లో పీఎంకే నేతృత్వంలోని ప్రభుత్వం ఏర్పాటవుతుందని అన్బుమణి చెప్పటం ఈ శతాబ్దంలోనే ఉత్తమ కామెడీ అని తెలిపారు. పౌరసత్వ సవరణ చట్టం, ఒకే దేశం- ఒకే ఎన్నికలు తదితరమైనవి అమలు కానివ్వమన్నారు. భాజపా ఎన్నిసార్లు రోడ్‌షో జరిపినా వారి ఓటు బ్యాంకు పెరగదని చెప్పారు. భాజపా ఎన్నికల మేనిఫెస్టో కాగితపు పూలవంటిదని పేర్కొన్నారు.