‘ఉక్కు పరిరక్షణకు మరో పోరాటానికి సిద్ధం కావాలి’

ఉక్కు సత్యాగ్రహ పాదయాత్రలో మాట్లాడుతున్న అమర్‌జిత్‌ కౌర్‌

పెదవాల్తేరు, న్యూస్‌టుడే : భాజపా ప్రభుత్వం కార్పొరేట్‌ వ్యక్తులు, శక్తులకు దేశాన్ని దోచిపెడుతోందని ఎ.ఐ.టి.యు.సి జాతీయ ప్రధాన కార్యదర్శి అమర్‌జిత్‌ కౌర్‌ అన్నారు. విశాఖ బీచ్‌రోడ్డులో ఆదివారం స్టీల్‌ప్లాంట్‌ పరిరక్షణ పోరాట కమిటీ ఆధ్వర్యంలో ఉక్కు సత్యాగ్రహ పాదయాత్ర నిర్వహించారు. ఈ కార్యక్రమంలో ముఖ్యఅతిథిగా పాల్గొన్న అమర్‌జిత్‌ కౌర్‌ మాట్లాడుతూ.. మోదీ ప్రభుత్వం లాభాల్లో నడుస్తున్న సంస్థలను ప్రైవేటీకరణ ఎందుకు చేస్తుందో చెప్పాలని ప్రశ్నించారు. కార్మికుల కృషితో విశాఖ స్టీల్‌ప్లాంట్‌ లాభాల్లో నడుస్తున్నా కావాలనే నష్టాలు వస్తున్నాయని దుష్ప్రచారం చేస్తున్నారన్నారు. కార్యక్రమంలో ఉక్కు పరిరక్షణ పోరాట కమిటీ ఛైర్మన్‌ ఆదినారాయణ, చోడవరం శాసనసభ్యులు ధర్మశ్రీ, తెలుగుదేశం నాయకులు శ్రీభరత్‌, సి.పి.ఎం నాయకులు సి.హెచ్‌.నర్సింగారావు, జనసేన నాయకులు అప్పారావు, విశాఖ జిల్లా కార్మిక సంఘాల జేఏసీ నాయకులు, పలు పార్టీల నేతలు పాల్గొన్నారు. ఈ సందర్భంగా వర్షం పడుతున్నా బీచ్‌రోడ్డులో ర్యాలీ నిర్వహించారు.