అధికారంలోకి రాగానే రూ.2 లక్షల రుణమాఫీ

ములుగు రూరల్, న్యూస్‌టుడే: కాంగ్రెస్‌ పార్టీ అధికారంలోకి రాగానే రూ.2 లక్షల రైతు రుణమాఫీ చేస్తామని ఎమ్మెల్యే సీతక్క అన్నారు. మండలంలోని దేవానగర్, ముద్దునురి తండాలలో పార్టీ జిల్లా అధ్యక్షులు కుమారస్వామి ఆధ్వర్యంలో శనివారం రైతు డిక్లరేషన్‌ రచ్చబండ కార్యక్రమానికి ఆమె ముఖ్యఅతిథిగా హాజరై మాట్లాడారు. రైతుల పంటలకు గిట్టుబాటు ధర కల్పించి కొనుగోలు చేస్తామన్నారు. ఉపాధి హామీ పథకానికి వ్యవసాయాన్ని అనుసంధానం చేస్తామని, పోడుభూముల్లో వ్యవసాయం చేసుకుంటున్న గిరిజనులకు యాజమాన్య హక్కు కల్పించి ధరణి పోర్టల్‌ను రద్దు చేస్తామని పేర్కొన్నారు. మెరుగైన రెవెన్యూ వ్యవస్థను తీసుకొస్తామని అన్నారు. కిసాన్‌ సెల్‌ జిల్లా అధ్యక్షులు గొల్లపెల్లి రాజేందర్‌ గౌడ్, యూత్‌ కాంగ్రెస్‌ జిల్లా అధ్యక్షులు బానోత్‌ రవిచందర్, నాయకులు చాంద్‌పాషా, బొక్క సత్తిరెడ్డి, రామకృష్ణ, రవీందర్, శ్యామ్, తిరుపతి, భద్రయ్య, జయపాల్‌రెడ్డి, భిక్షపతి, ఐలయ్య, సాంబయ్య, లత, రాములు, రంగమ్మ పాల్గొన్నారు.